趙瀚善身體語言咀掂楊子瑤
曾參演韓國電影《愛上蛋白質女孩》的韓星趙瀚善，最近首度來港拍港產片，與香港影壇新星楊子瑤合演情侶。他透露雙方有接吻親熱戲，雖然言語不通，會多用身體語言補救。
韓國男星趙瀚善、內地演員趙楚侖及香港影壇新星楊子瑤等，昨日出席電影《冬戀望日》開鏡儀式。雖然韓國與本地有文化差異，但趙瀚善亦入鄉隨俗拜神上香，祈求拍攝順利。首次拍港片的他透露韓國劇組多以豬頭進行儀式，故見眾人上香感覺新奇。
欣賞周星馳
趙瀚善透露與楊子瑤有感情線，但因雙方見面不多，再加上言語不通，往往要靠翻譯傳話，不過相信拍攝時靠身體語言溝通，定必事半功倍。問有否親熱戲？他謂：「床戲就冇，不過Kiss戲有。（會唔會指導楊子瑤？）唔敢話教，我一日就睇晒劇本，相信大家搵到愛嘅感覺就可以。（想同邊個港星合作？）我幾欣賞梁朝偉同周星馳，有機會合作就當然想啦！」曾擔任模特兒的他表示原定拍畢《冬》片後，要趕返韓國拍劇，奈何檔期仍未配合，故先拍攝一部當地電影才再作定案。
獲讚好靚仔
「處女下海」的楊子瑤坦言與趙瀚善演對手戲時雞同鴨講，她謂：「本身唔識韓文，講對白又講番自己語言，有時佢講完我都唔知，所以要記某一個音係代表乜嘢，跟住自己去畀反應。（有冇睇佢韓劇作品？）冇，但內地朋友一聽到佢個名就好開心，但佢哋住北京嚟唔到探班，不過佢都真係幾靚仔。」而趙楚侖表示戲中演花花公子，與以往所演過的角色不同，甚有挑戰性。他透露此行會留至月底才離開，期間會相約舊同學林夏薇聚會。
文：影視組