Ana R.貪舒服 要男友着boxer
混血名模Ana R.前晚出席Central/Central時裝活動，透露會為男友買衫及擔任對方的形象顧問：「同時裝有關嘅嘢佢都會問我，佢好信我嘅品味，大家嘅style差唔多，不過我哋唔會着情侶裝，反而試過冇夾定，但着咗同樣顏色嘅衫，呢啲係情侶嘅直覺。（佢買底褲會唔會問你？）唔會，不過我唔鍾意男友着緊身嘅三角褲，鍾意佢着boxer，感覺舒服啲。」
同場的Mandy Lieu將於本月20日生日，她稱朋友會請來相士為她算命，並順道為她改中文名，她笑說：「我只知自己姓劉，冇諗改咩名，可能叫劉血。」問到可有異性趁她生日約會她？她說：「有人約我22日生日去食飯，但我係20日生日，啲人都冇心。其實我有個好朋友喺馬拉結婚，但我應該返唔到去飲，我會着住佢送畀我嘅姊妹裙拍段片畀佢，但條裙好肉酸，似窗簾。」
