陳嘉容雨後有彩虹

陳：陳嘉容

記：記者

記：今年入行廿周年有咩感受？

陳：時間真係過得好快，眨吓眼就廿年，一直以嚟學咗好多嘢，無論係家庭、婚姻同工作，都有好多唔同嘅人生經歷，自己一直都係抱住一個好正面嘅態度去面對，即使係遇到唔如意嘅事，都要好自信咁嫣然一笑。我想勉勵所有女性，就算遇到逆境都唔好驚，任何方面嘅失敗都好，都相信雨後有彩虹，要學識雨中跳舞，雨中漫步，享受每個Moment，人生好短暫，嗰刻會唔開心，但知道會好快過去。要活得積極，同埋要時刻Keep住自己個狀態，將自己Keep得靚啲，個人都會開心啲。

高峰期日跑五場

記：Modeling事業最高峰時係點樣？

陳：每日跑五場騷，真係身心疲累，連續好多個月冇停過，連星期日都要開工，冇假期休息，陪唔到屋企人，就連做運動嘅時間都冇，但係我好Enjoy。我係工作狂，經過一日辛勞，返到屋企會覺得好滿足。依家諗番起都覺得嗰時好瘋狂，一日轉五個妝，整到眼痛。當時嘅心態係想賺多啲錢同埋抓緊每個機會，依家就會輕鬆啲，做想做嘅嘢。

陳嘉容想搵接班人，但談何容易。	教人扮靚是陳嘉容強項，也是她從事模特兒工作多年來的心得。	陳嘉容一有時間就增值自己。

記：事業最低潮呢？

陳：真係好感恩，冇經歷過真係好低潮嘅時期，不過低潮時就充實自己，利用嗰段時間去學好多嘢。2008年金融海嘯成個市都好差，我就喺嗰時盡量去學習，珠寶、紅酒、陶瓷同吹玻璃等，學啲Modeling以外嘅嘢，感覺好新鮮，亦都擴闊咗我嘅圈子同視野。

教人扮靚好滿足

記：做Model咁多年嚟有冇諗過放棄？

陳：從來都冇諗過放棄，即使係低潮時，我知係成個市道差，並唔係自己出咗問題。反而會多咗時間有學習機會去充實自己，亦都試多咗唔同範疇嘅發展，好似做主持。之前完全冇諗過自己會做主持，以前嘅我唔鍾意講嘢，覺得喺鏡頭前講嘢係人生一大挑戰，但原來衝破咗就會成功，可以繼續Move on迎接其他挑戰。之後就做導師教人着衫扮靚同儀態，嚟緊會幫啲公司做Training，教佢哋嘅員工打扮同儀態。都有啲太太搵我做佢哋嘅私人形象顧問同Stylist，呢個Market好大。見到人進步會好開心，好有滿足感，希望將美好嘅嘢同大家分享。

記：畀你揀多次會唔會做Model？

陳：絕對會，畀我再揀過都會做番呢行，我好享受同好熱愛Modeling嘅工作，我依家可以教人衣着打扮儀態等，全靠我咁多年喺Modeling學到嘅嘢，有好多得着先可以分享畀人，朋友話做呢行冇腦唔使諗嘢，做人肉衣架就得，梗係唔係，依家做Model同以前唔同，要不停Upgrade自己，要與時並進。

搵港女做接班人

記：點睇香港同內地Modeling行業？

陳：香港Modeling出現斷層，我成日想搵個土生土長嘅香港女仔栽培佢做我嘅接班人，我唔介意免費訓練同教佢，但搵唔到。內地Model簽外國Visa好容易，佢哋唔需要有公司，可以自己飛過去敲門自薦，機會自然多咗。其實內地嘅Modeling行業發展得好快，不過同香港比都仲差啲，但愈來愈進步。不過大家嘅文化同生活習慣好唔同，內地嘅Model唔鍾意Keep自己，例如佢哋唔敷Mask，唔注重護膚。有啲內地Model好靚，但佢哋會無端端吐痰，即刻扣晒分，唔可以得個殼，內涵都好緊要。佢哋有啲身價好高，成70萬人民幣一個騷，高過香港好多，好誇張，係喺國際上好Top嘅Model。佢哋出過外地行騷會好好多，有國際化視野。內地好多女仔唔夠Fashion sense，即使着到成身名牌都唔覺得靚，有錢但冇品味，有好大嘅進步空間。

記：點可以提升個人品味？

陳：睇多啲雜誌，參考吓啲明星名人Model嘅衣着打扮，了解自己嘅氣質、體形嘅優點同缺點，揚善隱惡，平、貴都可以有自己嘅Style，唔係成個名牌Logo擺上身幫人賣廣告。

記：你嘅Fashion icon？

陳：柯德莉夏萍，好鍾意佢嘅氣質，打扮Classic優雅，永遠都唔會Out，幾時睇番都係咁舒服悅目。

品味Update

教人穿衣打扮，幫人做Styling的Eunis即使本身具有Fashion sense，但亦會經常參考各國時尚雜誌以及網站來Update自己，並獲得Inspiration，她建議大家如想提升個人品味和潮流觸覺亦可以像她一樣：「睇多啲唔同國家嘅時尚、時裝雜誌，意大利、美國、英國同日本等都要睇，唔同地方都有唔同嘅風格，我自己多數睇《Vogue》同《Elle》，網頁就睇《fashion.com》同《vogue.com》，有好多時裝界嘅流行時尚資訊可以搵到。」

愛情甜蜜蜜

隨着年紀漸長經歷愈豐，Eunis多年來的愛情觀亦有所改變，她坦言：「以前拍拖唔會諗咁多，開心咗先，鍾意就得，依家會諗好多嘢，會諗長遠啲，例如會唔會有將來，唔敢博，冇咁多青春去花。外間好多人會驚另一半做呢行，所以識男仔好難。」而曾經歷婚姻失敗的她並未因此嚇怕了，依然相信愛情，期待結婚，憧憬有個完美婚禮。現在與印度籍機師男友感情生活甜蜜的她說：「愛情滋潤好緊要，個樣都會Sweet啲。」

採訪：張嘉敏

攝影：劉智源

化妝：Kamen Leung

服裝：Ted Baker

首飾及場地：BUTANI