秋生各師各法唔同偉仔比
黃秋生在新片《葉問——終極一戰》中，與曾志偉大打出手，笑言志偉行「打星運」，未來十年最啱演豬肉榮者，一定非志偉莫屬。談到偉仔亦飾演葉問，秋生直言無意與對方比較。
秋生為國藝影視與英皇電影聯合出品的《葉問——終極一戰》減磅及苦練詠春，戲中與飾演白鶴派傳人的志偉對打，文鬥武鬥兼備，他笑言：「志偉今次得呀！估唔到佢60歲人先嚟行打星運，今後邊個要拍豬肉榮傳，非佢莫屬，佢有排打啦！今次啲打戲個個係高手，熊欣欣、盧惠光，我打得開心又過癮。（怕唔怕觀眾將你同甄子丹、梁朝偉演嘅葉問作比較？）比較我同梁朝偉邊個靚仔啲呀？根本就唔同風格！唔知有咩好比，亦唔知可以比啲咩！」
大讚阿嬌洪天明
秋生也對鍾欣桐（阿嬌）、洪天明讚口不絕，他說：「阿嬌性格好可愛，好肯分享，佢演戲唔自私，好想成齣戲好；天明好努力，戲出咗之後，一定有人讚。演歌女珍妮嘅周楚楚好聰明，捕捉到嗰個年代外省歌女嘅神髓，加上編劇同導演將葉問同珍妮嘅感情戲交代得好好，幽幽嘅愛情，好斯文，邊似得依家啲人周街咀咁下流！」
邱禮濤恨拍續篇
導演邱禮濤則說：「比起《葉問前傳》，今次野心更大，梅花樁舞獅擒高擒低，場場都難拍，要多謝秋生、志偉同台前幕後嘅努力，大家都好有passion去拍呢套戲，我覺得葉問仲有好多古仔觀眾想睇、值得拍，仲有冇續篇，就要睇冼國林師傅同電影公司嘅意向啦！」
文：影視組
攝：沈健程
化妝：Jolinn Ng
髮型：Jeff 強仔
場地：陸智夫國術總會