張智霖雙手插袋型佬出巡
恩愛夫妻張智霖（Chilam）與老婆袁詠儀（靚靚）日前趁囝囝魔童返學，雙雙穿上情侶黑色羽絨拍拖到中環行街。但Chilam為保持型佬look，即使見到老婆拿着戰利品，都依然雙手插袋，繼續我行我素，未有出手相助。
靚靚自2006年11月為老公Chilam誕下寶貝仔「魔童」張慕童後，兩公婆依然恩恩愛愛，無論身在何處工作，Chilam都保持每日最少致電老婆一次，聯繫夫婦感情之外，還給老婆安全感。轉眼間魔童今年已6歲，他們有時間就會帶囝囝外出享天倫樂，一家三口樂也融融。
不停步 回頭交談
日前下午3時許，兩公婆帶囝囝到中環上興趣班，趁住囝囝未落堂，順道拍拖行街shopping。戴上太陽眼鏡、穿上情侶黑色羽絨的二人，先在該處名店行逛，不一會已有斬獲，見靚靚拿着戰利品步出。現年41歲的Chilam，天生一張孩子臉，像吃了防腐劑一樣，未知他是否為保持型佬形象，全程雙手插袋，keep住Chok。當靚靚要說話時，原本行前一個身位的他，只回頭望住老婆講話，未有放慢腳步，要靚靚加快步速遷就。
零詐型 樂做賢妻
其後他們再進入了另一時裝店睇衫，未幾又見靚靚手上多了一袋戰利品，Chilam眼見老婆挽着手袋及戰利品，依然雙手不離衫袋，沒有出手相助。不過，最難得的就是靚靚完全沒有詐型，甘願做Chilam背後的賢妻。
文、攝：追蹤組