蒙嘉慧怕「坐監」堅持唔生
鄭伊健與蒙嘉慧（YoYo）拍拖七年終於在年初開花結果，兩人在東京「閃婚」後更隨即傳出YoYo「喜上加喜」的好消息，不過，YoYo接受專訪時表示與伊健有唔生仔共識。曾發噩夢「有餡」的YoYo笑說：「對我嚟講就好似坐成年監咁。」
YoYo早前與方中信再度合作拍攝劇集《仁心解碼II》，她覺得老拍檔有了愛女後性情大變，見方中信與愛女講電話冧樣，感到窩心，問YoYo會否受影響生仔：「梗係唔會，睇住咁大變化唔想生，好多朋友、家姐都有小朋友就OK喇。暫時唔考慮生BB，同伊健都有共識唔生，伊健哥哥都有小朋友，奶奶亦冇畀壓力。」
劇中YoYo向方中信「借種」生仔，嘗過「大肚」滋味的她說：「見朋友佗住BB嗰十個月，對我嚟講好似坐監。有次夢見自己有咗，覺得係一個噩夢，諗起要煩BB讀邊間小學，自己又怕填表，就覺得佢又慘、我又慘。」婚後由YoYo變成鄭太，身份轉變但生活卻未有太大變化，YoYo表示婚後也不會減產，她笑說：「其實我已經唔多產，再減產會餓死。」
擔心冇工開
今次扮演精神科醫生的YoYo有更深體會，十多年前也受過情緒困擾，她說：「當年工作壓力好大，啱啱拍完一套劇就擔心緊之後有咩工作，嗰時一瞓醒就驚到喊。後來覺得唔對路，要叫自己學識放鬆，有睇中醫可以調理身體，後來諗通咗唔可以多啲嘢做，咪唔好咁大使。」緣分安排樂天派「人辦」伊健給YoYo，她說：「做人要令自己開心，伊健咪就係一個人辦，佢記性唔好，唔開心嘅嘢、工作辛苦完就唔記得。」
最希望種菜
有傳YoYo約滿無綫後將轉投王維基，無綫為免尷尬將她踢出《仁心》宣傳？她說：「之前係預咗期宣傳，但近日收到通知唔使去，合約嘅嘢交畀經理人去傾，我仲同無綫有合約。」監製羅永賢證實冇預YoYo宣傳，雖感可惜，但也要配合公司決定。
有傳伊健打本給YoYo開具玩店？她否認說：「唔會啦，自己份糧都唔去管，管其他錢銀就更加煩，做生意實會蝕本，我希望擁有自己嘅農場種菜、種果樹，實實在在有收成。」
文：影視組
髮型：Coren Cheung@HAiR
化妝：Dephine Chan
服裝：I.T
場地：Zeta Clinic