一向甚少拍動作片的樂壇天后「籮霸」珍妮花露柏絲（Jennifer Lopez）最近破天荒夥拍荷里活動作巨星積遜史特咸（Jason Statham）拍攝新片《轟天復仇》（Parker），雖然是拍動作片，但最多人談論莫過於珍妮花在片中的剝衫鏡頭！
一向行性感的珍妮花早前受訪，她笑言影片未上已看過原著小說的記者問她有關那場著名剝衫場面。該場戲是講珍妮花為了證明自己無裝偷聽器而在積遜面前剝衫，她表示曾有記者問她現實生活中男友Casper Smart會否睇到該場戲之後大呷乾醋？她就回應：「無呀，佢好喜歡該場戲，佢睇完之後猛讚我好正！」
珍妮花坦承作為一個專業演員，拍那場戲時絕對需要膽量，而拍之前必須要在心理及生理上作好充足的準備。不過就向記者呻拍攝時為了增加美感而節食，但拍完該場戲之後她就立即去買漢堡包食。
而積遜亦對珍妮花讚不絕口，然而《轟》要忠於原著的關係，將積遜飾演的柏加寫得符合原著般忠直，才令他與珍妮花在片中的親熱戲點到即止，此事令積遜大呼無癮。他說：「真係難以置信！點頂得順？係珍妮花露柏絲喎！唔通盲嘅？抑或懵到上心口？」
查實近年來珍妮花一直專注在樂壇上，甚少在大銀幕演出。其中只在《潮爆生仔秘笈》（What to Expect when you're Expecting） 及為《冰河世紀》（Ice Age）系列配音。據知她收到《轟》的劇本後立即就被片中人物所吸引，令她再度回歸影壇。珍妮花在訪問中說：「這是個不可多得的好劇本，令我戲癮大發！近年我拍過的電影實在太少了。因此，未來幾年我會把重心放回拍電影之上。」
文：外娛組