黃凱芹愧對學友 要Say Sorry
八十年代歌手黃凱芹（Chris）面對昔日同門的「歌神」張學友，心裏有愧，學友當年留下的一句說話，至今仍令他未能釋懷，他希望可以跟學友道歉，惜多年來一直與學友緣慳一面。
憶起當年寶麗金（環球唱片前身）盛世時，Chris形容當時歌手間中在公司碰到面，因各有各忙，大家都很少交談，他說：「人大咗依家見唔到面，反而會留意關心佢哋會點，好似老人家咁。」眼見昔日同門王馨平再次彈起、以及走紅的鄭嘉穎，他也戥他們開心，但想到學友就令他感到慚愧，他想對學友說聲：「sorry，抱歉。」
收花牌感動
事緣去年Chris開演唱會，看到學友送他的花牌，令他非常感動，他說︰「我同佢唔熟，同公司咁多年冇乜偈傾過，當時學友好紅，喺公司撞到佢係好神奇，有次喺活動度佢同我講：『Chris，你都冇播我歌嘅！』，到依家我都住個心度。」因為當時他也在電台當DJ，確實比較少播學友的歌，他強調非對學友有偏見，而是潛意識有鋤強扶弱心態，他說：「因為嗰時知道好多節目都會播學友嘅歌，所以我就揀啲少人播嘅歌，佢兜口兜面同我講，即係佢有留意我個節目，當時好想同佢講聲對唔住，當日見到佢個花牌，我真係依家都好慚愧。」
拒簽王維基
自嘆與學友無緣的他，去年緊記學友舉行演唱會時，送上花牌回禮。而早已移居加拿大的他，近年不時返港開騷，本月底更將在灣仔伊館舉行兩場演唱會，他說：「我係好被動，人哋覺得你冇價值都唔會搵你，唱咗咁多年我冇咩求，最緊要製作認真，畀到我有新鮮感，而歌迷又睇得開心。」去年王維基的電視台也有斟他做主持，但他說：「覺得冇乜挑戰性，點唔起心裏面團火，結果傾唔成。」
採訪：音樂組
髮型︰Ming Liu@Pop.8
化妝︰Him Wong
服裝：S.T.Dopont