阿Sa又屙又嘔 驚染新沙士
令人提心吊膽的新沙士，隨時殺入本港，前日發燒又屙又嘔的蔡卓妍（Sa）也一度擔心自己染上新沙士，但帶病在身的她，前晚仍死撐出席慈善活動，可謂善心爆棚。
前晚阿Sa、賭王千金何超盈、甄子丹太太汪詩詩及姨仔汪圓圓、腹大便便的名模Lisa S.、名模Ana R.拖着男友Bradley Garland、趙式芝與「老婆」楊如芯，以及藝人馬德鐘夫婦等一同出慈善餐舞會。一面倦容的阿Sa，透露正帶病在身，並擔心自己中新沙士：「有啲發燒，昨日（前日）又屙又嘔，媽咪話呢排流感勁，其實好番少少，可能早排出席頒獎禮後食咗個飯，化妝師話係地溝油飯，不過佢哋個個食完都冇事，我諗應該唔關事啩！（驚唔驚人類偏肺病毒？）唔係啩，都有啲驚，（驚係新沙士？）都驚係新型，助手叫我唔好去醫院睇醫生話多細菌，媽咪畀咗中藥我食，出咗一身汗，如果再發燒先睇醫生。」她說男友陳偉霆不在港，問男友有否越洋慰問？她說：「OK啦！」
李玟代姊報婚訊
同場李玟（CoCo）偕夫婿Bruce Rockowitz出席，其胞姊李思林亦拖另一半撐場，李玟並代家姐正式宣布已於前日註冊，稍後會補擺喜酒，如今三姐妹已全部出嫁，很戥家姐開心，又讚德國籍姐夫Stephen Windfelder很錫家姐，更笑家姐趕住造人，問她與Bruce又何時造人？她說：「我個『BB』就係新專輯，三月好多製作，又要拍MV，其實都想生，但工作緊要。」
薛芷倫計劃多多
另外，薛芷倫透露農曆新年去了日本旅行，復活節又計劃到美國探望小朋友，計劃多多的她，想學法文、意大利文和會計，又想做生意，但未決定做甚麼，最近她跟大廚朋友學煮餸，問識唔識煎蛋？她說：「梗係識。」她說經常出埠四圍食，味覺佔有優勢，至於擇偶方面，她說：「都係嗰句，任何國籍、年紀都唔係一個因素。」
文：名人組