林峯諗定結婚 當千語家人
剛與女友吳千語三度外遊的林峯，昨日是他「預支蜜月」後首度公開現身，更一改遲到陋習現身簽唱會。全程冧笑的他，除表示受千語影響是正常外，提到女友叫他真名時，一臉冧樣認定女友是屋企人，更視她為結婚對象。
林峯與女友千語結束農曆新年浪漫歐遊後，昨日林峯出席「馬鞍山新港城中心 X林峯A Time 4 You 簽唱會」，蜜運中的他全程四萬笑容。說到吳千語稱叫他真名阿文（林滙文），記者打趣問大家可否都跟千語這樣叫他？林峯稱通常是屋企人叫。問他當千語做屋企人？林峯冧樣點頭。
至於林峯昨日一改陋習未有遲到，林峯笑言：「係，多謝！（聽晒女友話？）一路都有改進緊，我唔係好嚴重啫！（受女友影響？）好正常嘅，兩個人拍拖互相影響都係好事。」問到兩人旅行是否同床及可擔心「搞出人命」？林峯即尷尬說私人事不多說。有指他豪花50萬和女友旅行？他亦不作回應。見林峯答到滿頭大汗，他抵死說：「唔關問題事，係我跳完舞咋。」視千語為結婚對象？他更隔空派定心丸：「一定係認真。」
否認為愛推Job
對有指他為旅行推工作，未有宣傳電影《忠烈楊家將》，林峯堅稱一早計劃旅行，當時亦未落實電影的宣傳期，周二將前往北京宣傳。不過，林峯對千語愛得癡纏，日前就見他陪女友唱K，他解釋當晚在附近與友人晚飯，之後才去找女友。做「跟得男友」？林峯即甜笑受落。
另外，提到林峯早年曾合作拍電視劇《摘星之旅》的內地女演員宋汶霏昨日凌晨因癌病逝世，林峯得悉感到愕然，替對方惋惜。據知只得27歲的宋汶霏，因忙於拍劇耽誤了四個月，導致病情惡化，最終返魂乏術。
文：音樂組