朱希敏披婚紗未嫁得

前港姐亞軍朱希敏（Hyman）與前香港先生李善恒（Jacky），於去年初被本報拍得在山頂攬啜，公開戀情後一直愛得癡纏，日前Hyman於微博上載兩人「婚照」，更掩嘴宣布：「今日我結婚了！」旋即引來網民留言祝賀，兼大讚二人好相襯。Jacky昨透過電話否認婚訊，聲稱只是替好友拍攝婚紗宣傳照，問到何時「嚟真」結婚？他說：「未有咁快，但影嗰陣都好開心。（令你有衝動結婚？）我哋拍咗一年拖好穩定，但大家都想工作先，等我賺到一個水平先考慮結婚，可能兩、三年內。（女友有逼婚？）佢仲好細個啫。」