香香誘人緣鹹濕仔圍攻

藝人張兆輝、周海媚、謝天華、徐子珊、岑麗香、張致恒（Steven）、溫家偉等昨日出席劇集《神槍狙擊2013》拜神儀式，對於有指香香在拍攝此劇時被一眾猛男大獻殷勤，連身為女主角的徐子珊亦表示預了給香香搶鏡，她說：「同佢點搶呀，唔使諗啦，如果我係男仔我都會追香香。」而香香則笑說：「因為飛虎隊得我係女仔，佢哋真係好好，會教我中文同體能上嘅嘢。（邊個最好？）翟威廉，因為我哋係同一個經理人，而且我終於明白咩叫Guy Talk（男仔間的對話）。（佢哋講鹹濕嘢？）哈哈，有啲嘢我會選擇唔聽，行開，有時我覺得鬼妹仔唔明中文好幸福。」

Steven爆有意中人

早前有指Steven是追求香香最落力的一位，對此Steven說：「好好笑，其實唔只我一個教佢戲，劇組個個都有幫佢拼音同背對白。」在劇中要力追香香的他有否戲假情真，他即自爆：「點會？我已經有意中人，目標好明確，係唔會變心改追第二個。（目標係緋聞女友鍾舒漫？）唔講。（圈外定圈內人？）唔講，仲未追到。」

同屬靚女的徐子珊自問唔夠岑麗香爭仔。	張兆輝笑言太多女埋身招架不住。	香香大受劇中眾男歡迎。

張兆輝唔同後生爭

同是「追香一族」的溫家偉就不避嫌大讚香香靚女兼性格好，問他會否對香香展開追求攻勢時，他即笑淫淫說：「我唔會特別主動去追，要發生嘅事就會發生。」又表示未試過跟香香單獨食飯，着記者幫他拉攏。而張兆輝對於劇中好多男仔追香香，他即置身事外笑說：「等啲後生追啦。（你戲中都有周海媚同徐子珊！）兩個夠喇，唔係啲戲會分身不暇。」

文：影視組