歐遊10日同房 樂霏返港嗌攰
【駐英記者章怡直擊】余文樂、吳雨霏（Kary）結束10日歐遊之旅返港首度默認戀情！本報快人一步到倫敦希思路機場拍得兩人斷正合照，直擊阿樂當護花使者，除挺身應付傳媒外，讓Kary安心做背後小女人，見行李車重，他亦幫女友推車入閘上機，全程如影隨形。但返港後，兩人又變得避忌，分閘而出，但異口同聲笑住嗌「好攰」，相當合拍。
「樂霏戀」終於明朗化！阿樂於年初八帶女友Kary遠走英國及瑞士，享受二人世界兼慶祝中國情人節，10日愉快假期昨日結束，這對被部分網民「dislike」又要八卦的是非情侶，前晚被本報記者拍得兩人現身倫敦希思路機場，乘搭英國時間10時05分的CX254航機回程。
不過兩人似乎快樂不知時日過，在機場櫃位關閉15分鐘前，才匆匆趕到辦理登機手續。見身穿軍綠色情侶褸的兩人，各自推住載滿4個大篋的行李車，其中2個篋更是同款不同色的情侶款，估計兩人的行李重達最少超過150公斤。幸好阿樂豪氣地為女友訂了商務機票，否則如搭經濟位，必定要付可多買兩張機票的超重附加費，亦可知阿樂玩得精明。先行的阿樂心痛纖瘦的Kary辛勞，途中幫手為女友推行李車。
風騷擺勝利手勢
辦完登機手續後，兩人邊行邊傾沿扶手電梯上一樓進入離境的安檢閘口。當阿樂見記者拍照，即有點不悅兼無奈，但沒有發惡，只勉強地笑說：「唔好影。」問是否秘密拍拖？阿樂沒回答，急急腳走向禁區的安檢閘口，而默默跟住男友的Kary十足小女人，全程保持緘默，與阿樂一樣不抗拒拍照。
昨日傍晚兩人齊抵達香港機場後，又回復高度避忌。約6時40分，阿樂步出B閘口，有4位同事及逾30位傳媒接機，身穿便裝、戴平光眼鏡的他捱了10多小時長途機，依然心情大好，大方企定影相，更風騷擺出勝利手勢。他詐嬌說：「我好攰，好想返屋企，我冇諗過做訪問。」問他是否玩到腳仔軟？他風騷說：「去旅行梗係去玩啦！」再問他跟Kary去旅行是否因感情穩定？他又扮傻說不明問題。至於和Kary關係如何？他避談：「我之前都講過，工作以外好少講，唔想回應咁多，尤其係感情事，唔想答太多。（如果話Kary係你女朋友介唔介意？）唔知。」並要求記者放過他，否認是保護愛情，只是好攰想回家，又指不是他一個人的事，望給他多點時間及尊重，回港後要努力工作賺錢。
「我正過周柏豪」
記者讚阿樂豪花十多萬包Kary機票、食宿歐遊，他騎騎笑默認說：「我不嬲都大方，都有請你哋食飯。」問到兩人是否同房？他拍拍記者膊頭：「我有好多間房。」提到有傳Kary因追求周柏豪不遂而轉溝他，阿樂笑言：「我正過周柏豪！」隨後他在Instagram上載母親照片，並留言「回港第一件事就要同她食飯」。
遲阿樂約10分鐘、由A閘步出的Kary全程低頭微笑，但表現驚青，期間因太混亂被傳媒咪牌扑頭，她身邊3位唱片公司人員推住她離開。問和阿樂的關係時，她說：「我啱啱返嚟，唔知你哋接機，好surprise！（係咪同阿樂拍拖？）遲啲先再講。」問是否和阿樂同房？她嚇到瞪大眼，然後笑着叫記者：「行啦，行啦！」再問是否受公司壓力？她說：「好攰，好攰。」Kary亦冷笑否認周柏豪唔受溝而轉鎅阿樂，並指兩個人都「正」。據知Kary將會見唱片公司高層交代戀事。
文：音樂組