咪咪姐一字馬失手金剛救駕
朱咪咪一連兩場的「朱咪咪大吉利是演唱會2013」前晚假紅館正式開鑼，咪咪姐在兩隻醒獅護駕下「打鑼打鼓」出場。雖然前晚已是農曆年十四，但當咪咪姐行近觀眾席和歌迷握手時，一眾歌迷粉絲依然識做地向她猛塞利是，收利是收到手軟的咪咪姐甚至一度停唱，專注「搵外快」，場面搞笑！
盪胸扮奶媽
當晚咪咪姐請來多位嘉賓助陣，其中古明華再度「蘇基」上身，更和朱咪咪在台上上演「母子重逢」，在《巴不得媽媽》飾演蘇基媽媽的咪咪姐一見「兒子」就多次笑言：「你老母我呀！」令全場觀眾笑爆咀。
期後咪咪姐向高難度挑戰，在台上「腿張開」大玩一字馬，但年近60歲的咪咪姐卻老貓燒鬚，施展完一字馬後一坐不起，要大嗌：「邊個扶我呀？」結果由另一嘉賓金剛救駕攙扶。金剛出盡吃奶的力「抽」起咪咪姐後，問她：「你便急呀？」咪咪反擊說：「我係忽必裂呀！」金剛又用唔鹹唔淡廣東話大講有味笑話：「今日我哋合唱《烏蠅的啫啫》（註：普通話《無言的結局》）。」最後咪咪姐又和謝雪心合唱粵曲，謝雪心稱會在新劇扮演奶媽一角，咪咪姐聞言即大放笑彈：「你同我爭飯碗？等我教你做奶媽！」說罷即表演盪胸，認真爆笑！
文：音樂組