城城唔使金像獎鼓勵
天王郭富城昨日出席活動，透露下個月舉行的演唱會，將會挑戰更危險的動作，而完成個唱後，便會將重心移回影壇。未能入圍金像獎的城城，坦言感到失望，幸而得到周潤發的讚賞，並說：「拍戲最緊要係鼓勵，香港金像獎唔鼓勵唔緊要！」
郭富城昨日出席新歌《天機密語》MV首播會，現場除播放其新歌MV外，城城又與一眾舞蹈員預演個唱中《牛魔王大鬧天宮》的一部分。下個月將連開9場「舞臨盛宴安哥篇演唱會」的城城，透露今次安哥篇有別之前，除換上全新服裝，亦會加入與所演電影有關的元素，至於變形金剛舞台及彈床部分則會保留：「舞蹈會完全唔同，會加重當中的危險動作，唔會減少。（保費加碼？）基本保險會有，加唔加碼就唔知。」
坦言有失望
城城表示完成個唱後會主力拍電影，有傳周潤發會拍《寒戰2》？他說：「係就好，我知佢有睇過《寒戰》，亦讚我做得好，好開心。我同發哥之前有合作過，但對手戲唔夠喉，希望可以再鬥文戲。總之，發哥，我等你！（冇份入圍金像獎感失望？）失望係有，冇理由唔將感覺講出嚟，但尊重香港金像獎評審，拍戲最緊要係鼓勵，香港金像獎唔鼓勵唔緊要。」
適逢昨日元宵佳節，城城直言會返家與母親度過，問到為何不約女友？他說：「感情順其自然，隨遇而安，媽咪最重要，做完嘢都希望同家人團圓。」提到相士指他今年易有喜慶事，而女友熊黛林曾言想結婚，城城表示每個人都有自己的想法，但自己會事業為先。
文：音樂組