劉心悠誘姿勢有實際
影星劉心悠、英皇歌手湯怡等昨日參與馬拉松賽事，弱質纖纖的湯怡在參賽女藝人中最快完成賽事；心悠雖比湯怡遲返終點8分鐘，但勝在跑姿誘人，就連拉筋、壓腿等熱身動作也吸引眾人目光，成績也比去年進步！
一年一度馬拉松賽昨日開跑，影星劉心悠、梁琤、英皇歌手湯怡、鍾舒漫、關智斌、吳浩康、女子組合HotCha成員Winkie及Crystal、o靚模Celia K.（郭穎兒）、陳奕迅太太徐濠縈、鄭融等均不約而同參與10公里賽事。
賽前積極備戰的心悠，昨凌晨4時已到場，她於開跑前說：「我第7次跑10公里賽，上年成績1小時十幾分鐘，今年想1個鐘內完成。我尋晚9點起身，仲提早2日調整時差，新年又減肥。（潮濕天氣影響發揮？）做耐啲熱身同拉筋！我喺運動場可以跑1個鐘，跑東廊未知會點。」跑姿優美的心悠，最終以1小時零5分鐘完成，未達自己目標，但已比去年進步。
Celia K.露腰出戰
湯怡以57分鐘完成10公里賽，屬女藝人中最好成績，賽前無人估計到弱質纖纖的她竟如此跑得。Celia K.則以粉紅背心露腰出戰，她說：「好多情侶拖手跑，眼冤又羨慕，希望出年有男友陪我跑。」梁琤則以1小時40分鐘完成賽事，她說：「我第一次跑，自覺OK，跑起嚟都有壓力，好在有人打氣。」HotCha成員Winkie則揚言不怕暈低：「路邊有蕉食o架嘛！食蕉可以補充體力。」
文：影視組