馬德鐘藉廿周年再娶「老婆」

藝人馬德鐘與太太張筱蘭、名模熊黛林（Lynn）與Jocelyn夫婦、恒生新抱何倍倩、「扒女」李依琳等，昨晚出席Dior裝置專門店酒會，近日在橫店拍戲的馬德鐘昨午才抵港，晚上就與太太出席活動，近年兩人形影不離，經常恩愛出席活動。問馬德鐘情人節點過？他表示只是平淡度過，但今年是結婚廿周年，將會大事慶祝：「我同老婆想搞個大派對，廿年前結婚儀式比較簡單，就咁註冊，而且有相士講，我會結兩次婚，我要再結第二次婚都係同呢個老婆，所以今年會補影婚紗相，之前冇影過。（會否再宣誓？）要睇派對形式點安排，會揀一個特別嘅地方。」

他又透露兩人在6月28日結婚，今年亦將會在同日再婚。在旁的馬太被問到是否感動？馬德鐘即搶答：「都老夫老妻啦！」而囝囝會否擔任花仔？馬太說：「佢同老公一樣咁高啦。（做伴郎？）都好。」另外，馬太前晚在微博上載兩人廿年前的結婚證書，寫上：「這是差不多20年前的青葱歲月。」馬德鐘回應：「當日你下嫁畀我時，我甚麼也沒有！連結婚也只是在『流動的鄉公所』，片段還在眼前。」

熊黛林直言想快啲有個家，擺明恨嫁。

何倍倩懷有六個月身孕，但動作仍見輕盈。

Lynn珍惜眼前人

Lynn着上半吋踭的鞋子到場，即被問是否有喜？她否認說：「未有，可能今年興，好多品牌都送冇踭鞋，（有喜會否公布？）我唔會瞞。」繼又表示自父親離世後更懂得珍惜眼前人，而是否現很珍惜男友郭富城？她甜笑說：「OK啦，平時咁就OK啦。（城城對你更珍惜？）你問番佢。（有堪輿學家批你哋好事近？）講咗好多年，借佢哋嘅吉言，等自己快啲有個家，依家住嘅都係租，都想快啲買樓。」Lynn又透露除了在南京搬新屋外，香港亦搬了新居。

何倍倩自嘲似豬

而懷有六個月龍鳳胎的何倍倩自嘲似豬，她笑說：「最近食多咗朱古力，肥到似豬咁食完瞓，肚大咗好多。（BB改名未？）老公比較迷信，等BB出世睇時辰八字先，上一胎生完好爽，好似攞咗個波出嚟，希望今次都有呢個feel。」

文：名人組