王君馨守候6年再續前緣

訴說理想支持帶來感動

君馨在愛情路上尋尋覓覓，三度戀愛後，單身6年，主終於安排了Mr.Right出現，君馨終宣布拍拖了！正當眾人猜測誰是她的現任男友時，原來眾裡尋他仍然是他，就是他的前一任男友！

以前喺美國嘅時候，曾經做過侍應，而當時就喺餐廳上遇到我第三個男朋友。仲記得本身佢諗住穿過餐廳去停車場，點知畀我截住問佢：「你係唔係想食飯呢？」佢聽完之後即刻呆咗，然後點點頭，支煙仲叼住喺嘴角。跟住我同我個侍應朋友講：「嗰個男仔好靚仔。」點知我朋友話：「佢係我個Friend！」我尷尬到當場面紅衝入廁所。

王君馨與苟芸慧同是娛圈聖潔之人。	曾出戰《舞動奇跡》的王君馨，本身舞蹈根底不俗。	王君馨愛惜身體，難怪對從事援交的女子感嘆殊深。

親手沖調咖啡

有一次，佢同朋友嚟食飯，我幫佢哋落單，佢啲朋友個個都嗌酒飲，唯獨佢嗌熱咖啡，已經覺得佢與眾不同，跟住我衝入廚房親手整一杯焦糖Mocha畀佢飲。自此，佢逢星期五、六都會嚟餐廳飲我親手沖嘅咖啡。其後，佢終於鼓起勇氣約我去食韓國豆腐，當時佢問起我嘅理想，我話想喺香港做一位pop star，佢聽完竟然話：「好呀，我支持你。」我好感動，因為佢完全唔覺得我係個發明星夢嘅女仔。後來我要返香港發展，加上又覺得同佢性格一動一靜，都係覺得做朋友適合啲，之後我哋就分手。

王君馨無懼分隔異地，勇敢去愛。	王君馨向來演出都以火辣為主，出水戲騷身材屬意料之內。	王君馨對愛情執着，不遇真愛，決不輕言以身相許。

維繫異地戀情

不過，我覺得上年主畀咗一份好好嘅禮物我。其實佢係一個努力、上進，未試過講大話嘅老實男仔！以前我同佢溝通，好多時傾唔掂，都會發脾氣，但依家佢都信咗主，我哋可以透過聖經去解決。我好開心我哋都好支持對方嘅事業，有時佢又會陪我去咖啡室讀劇本，真係好體貼。雖然佢遲啲要返美國，我哋要繼續維持Long-distance，但我哋都會成日傾偈、關心同了解對方！

堅守原則犧牲方算愛情

堅守原則犧牲方算愛情

王君馨雖然在銀幕上總是火辣獻身，不過聖潔才是其真正底蘊。自去年自爆處女後，動輒即扯上這兩個敏感字詞。不過若回帶至2010年，其實君馨當時早已承認聖潔之體，相隔兩年，外間的反應卻如此激烈，君馨亦不明所以，惟一早已學懂的是其愛情原則。

對於愛情，我有一個原則：如果唔可以同對方講I Love you，就唔可以同佢發生性行為；唔可以為對方死，就唔可以同佢講I Love you，由7歲開始我就堅持呢個原則至今時今日。我嘅初戀係17歲，我同一個好虔誠嘅韓國籍基督徒拍拖，佢係一個好好嘅男仔，就算Kiss都會隔住兩個手指公去錫，因為佢覺得即使接吻已經對一個女仔都太重要。後嚟我覺得佢太乖，覺得真命天子唔係佢，拍咗兩個月之後就分咗手！

無謂浪費時間

第二次我同一個外國白人拍拖，我鍾意咗佢一年先開始！我同佢係玩跳舞機認識，當時佢係全紐約玩跳舞機第二叻嘅人，我好欣賞佢！之後，我仲見過佢嘅家長，但佢嘅家人係一啲坐得好直、好斯文嘅人，好似木頭咁，我覺得好辛苦。而我亦感覺佢哋係想個仔搵一個白人女仔多過一個中國人，慢慢我覺得同佢嘅距離愈來愈遠。有一次我多口同佢講：「我覺得你唔係the one，我嘅purity畀唔到你。」跟住佢聽完好嬲，仲為咗呢樣嘢向我發脾氣，跟住我覺得好唔make sense，就同佢分手。第二日，佢都有搵番我道歉，但我同佢講唔好嘥大家時間，最後我哋拍咗兩個月就分手。

後記：

君馨對於貞潔抱有一貫的堅持作風，即使談到現時少女的援交現象，她亦深感痛心，更慨嘆地說：「有時睇新聞，見到佢哋竟然去敲門問人哋需唔需要服務，我真係想問吓知唔知佢哋賣緊啲乜，同埋咁做會傷害到第時嘅老公？所以我覺得佢哋依家應該畀多啲心機讀書。」聽罷即忽發奇想，如果政府能找君馨賣反少女援交廣告，可能極為湊效！

口述：王君馨

筆錄：文珊

攝：秦健輝

服裝、場地：Amen Pap

髮型：Mo@HH

化妝：Pheobe

鞋子：Avenues