Bobby晒V出院 喊啜老婆
歐陽震華（Bobby）早前因急性肺炎一度要入ICU搶救，幸運地他昨日情況轉好出院，眼見太太近日既擔心又頻撲，Bobby坦言相當肉赤，期間更與太太相擁而哭，在旁的經理人也難忍淚水，場面感人；Bobby即場向太太承諾今後會檢點，更肉緊獻吻，表達無言感激！
「無綫福將」Bobby農曆年初二晚與眾好友歡聚時，突然身體不適，一度昏迷，即時入院搶救，更因急性肺炎而入住深切治療部（ICU）留院多日，情況告急，不少圈中好友如陶大宇、吳啟華、關詠荷等都大表緊張，幸Bobby憑堅強意志，加上太太傅潔嫻、經理人Lydia及醫護人員悉心照料，終逃過鬼門關，連日來均見有起色。
肉赤太太暴瘦
昨早11時，經理人Lydia拿着一碗粥到灣仔律敦治醫院，45分鐘後，傅潔嫻拿着一袋衣物抵達，至12時許，由太太及經理人陪同出院的Bobby終現身，戴着灰色冷帽的他明顯瘦了一圈，不過也算精神，拍照時更鬼馬雙手舉V，笑容滿臉。Bobby受訪時坦言已好轉八、九成，又大讚醫生及工作人員處理得相當好，他謂：「全靠佢哋危急時搶救番我，醫生都有讚我意志力好，我半夜3點昏迷，之後嗰日下午2點扎醒，插喉時都有知覺、意識，只係手腳唔郁得。」他又笑言現時比入院前更健康：「之前插喉時好辛苦，真係唔好再試。」談到他瘦了很多，他謂：「太太瘦得仲多，我都好肉赤。」Bobby坦言要多謝太太，更示意太太來到他身邊，二人深情擁抱，傅潔嫻即感觸落淚，經理人Lydia則哭着向Bobby說：「我唔係細你好多，唔好再嚇我！」Bobby又說：「其實太太今次都受驚，比我更加需要補番吓，我應承佢，以後飲食方面檢點啲，總之樣樣七成，玩同食都唔會咁盡，好多同事、內地fans都好關心我。」說時Bobby亦一時感觸，忍不住落淚，場面感人，Bobby更吻向太太面珠，感謝太太連日來照料。
飲酒適可而止
Bobby坦言出事前一晚吃得太飽，又食海膽、肥牛，翌日再跟朋友玩樂至深宵終於出事，致食物入錯氣管。問他是否與飲酒有關？他謂：「我係有飲，但唔係豪飲，（戒酒？）唔想開空頭支票，酒又唔係毒藥，唔通應酬揸住杯茶咩！除非換晒啲朋友，但以後飲酒會適量。」
談到工作方面，Bobby表示休息數天後便要開工，之後會到佛山為《情逆三世緣》拍外景，更有不少槍戰、追逐戲，他又謂：「因為之前打咗強心針，依家隻手伸唔直，未揸到槍。」問他出院後第一件事想做甚麼？他謂：「最想返屋企見吓隻狗，老婆話隻狗好掛住我，成日入房搵我。」
文：影視組