Miki被指拜金 受傷害匿埋
最近轉型拍電視劇的歌星楊愛瑾（Miki），自從戀上永安百貨太子爺郭永淳後，Miki慘遭負面報道纏身，甚至影響客戶對她的信心，令她感到很辛苦，她最介意被指拜金，更曾為一些報道匿埋不敢出街。
在浪漫情人節生日的Miki當日與大班友人一齊慶祝，她笑說：「咁多年情人節我都係同班朋友一齊過，尤其是單身朋友，等大家都熱熱鬧鬧，我反而唔鍾意燭光晚餐，因為平時都可以啦。（收雙份禮物？）通常大份啲，我鍾意心意嘢，如果用錢買到，自己都識買。」談到生日願望Miki希望遠離負面新聞。
未能分享
跟郭永淳拍拖多年，Miki絕少談及感情事，她希望低調處理私人事，她說：「始終做藝人，我想人哋關注我做嘅嘢，將來去到某個位，我樂於同大家分享，但依家未去到，唔想成日講。」有指她的好姊妹鄧麗欣、區文詩都大方公開感情生活，兩pair人不知幾甜蜜，她說：「我都戥佢哋開心，但唔代表我唔開心，只係每段關係未必係大家所知嘅。」
改變睇法
男友被冠以「富二代」，Miki坦言一些負面報道令她很不開心，甚至被新聞嚇怕，覺得受傷害，連街都不敢出：「嗰啲新聞講到我好衰，話我唔憂做，好負面、好名利，令人好易誤會，解釋咗人哋又未必信，真係幾辛苦，覺得唔公平，自己好努力工作，希望盡量改變人哋嘅睇法。」甚至有些客戶被報道影響誤以為Miki唔憂做，她最介意被指拜金：「最慘我唔係，如果係就冇所謂，惟有做好自己，起碼對得住自己。」
文：音樂組
攝影：謝國華
場地：海港城