60歲甄妮恨結婚生多兩件
甄妮一連三場個唱前晚完美落幕，當日同為甄妮60歲生日，育有一女的她於慶功宴上笑言其中兩個願望是找到伴侶結婚及生多兩個仔！揚言不會再於香港開騷的她，演唱期間遇到捧場的好友即感觸落淚。
甄妮前晚完成《愛SHOW世界巡迴演唱會「完美篇」》，當甄妮於個唱上見到楊凡及姚煒即不禁落淚，適逢當日亦是其60歲生日，台上擺放巨型吹氣蛋糕，歌迷並兩度唱生日歌，令甄妮感動落淚。完成個唱後，甄妮於紅館玻璃門位置為歌迷簽名，黃夏蕙亦有排隊索合照。
慶功宴上，甄妮笑說其60歲生日願望是環遊世界、找到伴侶結婚及生多兩個仔，問到願望是真是假？她說：「3個都係假，但生日一定要有願望，如果咁都中我就係最幸運嘅人！（想結婚？）講到我咁惡冇人敢娶我，60歲唔好拍拖喇，搵個Roommate（室友），但一定要個女同意先，佢成日都迫我去拍拖！我想要傾到偈，嗜好、想法相同嘅人，如果唔係一個講天一個講地就嘥時間。」她又透露曾有朋友追求，但已沒下文。問她於個唱尾聲唱出林振強寫她思念亡夫傅聲的《Love is over》，是否獻給傅聲？她說：「冇話畀邊個，佢都唔喺度30年喇，過去由它過去，要接受。」
勸年輕人多修養
提到甄妮於個唱中講及大肺小肺，問到是否指鄧紫棋（G.E.M.）？她解釋：「冇指任何人，因為唔想講任何嘅名。個個人有一片天，希望做好自己嘅本分，尤其係年輕嘅朋友，有更多修養、學識，將自己發揚光大，會有更多人鍾意你。」她又言之後不會再於香港開騷，最多只會當嘉賓：「有人肯請而我又幫到嘅先做，如果張敬軒搵我就會做！（G.E.M.搵你？）搵過，但唔適宜去做。」甄妮謂之前已簽合約，於不同地方開騷，但因答應讓女兒回紐約及認為身體未能負擔，只想做輕鬆演出：「如果唱半個鐘，又送好多銀紙監我賺都可以！」
文：音樂組