王維基扮friend 盛品儒派檸檬

無綫高層鄭善強、王維基及盛品儒等傳媒機構代表，昨日出席電台團拜活動，首度同場的王維基、鄭善強及盛品儒成為全場焦點。無綫及亞視反對政府發新牌照，而盛品儒曾告王維基涉嫌偷取亞視機密商業資料，王維基則反告他誹謗，關係可謂勢成水火！

「費事人哋難做」

王維基於活動前受訪，他得知另外兩位高層亦會同場，明言望與兩位握手，惜事與願違，更慘食檸檬。於眾人就座前，王維基經過盛品儒身旁時友善打招呼，記者即要求合照，但盛品儒卻表現避忌，對記者要求充耳不聞兼立即擰歪面，慘食檸檬的王維基只好拍一拍對方手臂走開。

王維基與亞視的盛品儒被邀合照，後者竟大派檸檬擰歪面唔睬王維基。

昨日的電台團拜中，電子傳媒的高層大合照，王維基（前左）始終靠邊站。

鄭善強及盛品儒於活動中坐正中間，王維基則被安排坐於旁邊位置，三人全程沒甚交流，王維基講恭賀說話時，主持笑言：「我聽到後面講『恭喜發牌』！」鄭善強聞言笑個不停，反之盛品儒卻笑容僵硬。活動結束後，記者要求盛、鄭合照，盛品儒再扮聽唔到，更急急腳離開，至於王維基亦耍手擰頭說：「唔好搞到人哋，費事人哋難做。」

（左起）王梓軒、石祐珊 出席團拜活動

（左起）麥貝夷、鍾一憲 出席團拜活動

企硬立場反發牌

王維基受訪時表示發牌是政府的責任，已遞交所有資料，問到可會叫同業支持？他說：「除咗兩個免費電視台之外，其他都好支持，在商言商，係有矛盾喺度，利益者嚟講想少啲競爭，而市民就一面倒支持，各為其主，佢哋亦有難處。」他否認叫藝員到政府總部，並說有信心於下月底通過議案：「雖然係冇約束力議案，但政黨都支持，3月底係一個可行性嘅日子。（無綫進行司法覆核會有影響？）相信會發牌。」而盛品儒接受電話訪問時為「派檸檬」一事作解釋：「當時好混亂，王維基話：『記者話影相喎。』佢拍一拍我就走，可能活動就開始。」他謂活動上未有逐一與媒體代表交流，並直認會特別避開王維基：「始終亞視反對發牌，會避忌啲。（兩個私下唔妥？）其他嘢唔講啦。」

文：音樂組