阿樂吳雨霏暗交 王菀之：唔出奇
余文樂（阿樂）跟同期出道的吳雨霏（Kary）被爆暗撻三個月，與「網球王子」洪立熙復合後再鬧情變的Kary，早前宣布回復單身，情人節當天她跟阿樂在赤柱密會斷正，阿樂及Kary的經理人公司異口齊聲表示：「冇回應。」最巧合兩人都不在香港，莫非拍拖出外蜜遊？前年情人節被影到與Kary同行的周柏豪，同樣是阿樂的密友兼波友，柏豪也表示冇回應。
Kary死黨區文詩昨日說：「Kary好似飛咗，姊妹格言唔可以講對方戀情，今日都收到好多電話問我係咪真，我冇睇雜誌，唔想八卦，（信唔信佢哋拍拖？）冇所謂，如果係自然會講，佢返嚟都唔使問，（等佢自己講？）睇吓佢點答記者先，姊妹之間要知就講咗，唔知就唔使多問。」王菀之昨日出席活動就爆好友Kary多人追，有拖拍都不出奇，她笑說：「最緊要佢開心，介紹多啲畀我。」
