Bobby感激袁偉豪神之手救命
歐陽震華因急性肺炎被送入院，病情好轉的他昨日接受電話訪問，親述事發當時情況，以及生死十二小時搶救經歷，他慶幸自己意志力強及早甦醒，否則有機會變成植物人，直言今次死過翻生。
演員歐陽震華（Bobby）農曆年間因急性肺炎被送院搶救，現情況良好已由ICU病房轉到特別病房，估計本周便可出院回家休息。昨日，他更接受無綫娛樂新聞台黎芷珊的電話訪問，中氣尚算不錯的他，訪問期間亦有幾聲咳，令訪問中斷了數秒給他回氣。他在訪問中甫開口便說：「恭喜發財，身體健康。醫生話驗埋血再照埋個肺，驚啲食物殘渣喺肺裏面，要咳番出嚟。」
「唔好咬到條脷」
問到昏迷前最後的一個畫面，他憶述說：「只記得成班人喺朋友家影緊相，其他真係唔知嘞。之後太太講番我知，當時我一個人行咗去梳化坐低，好似恰着咗咁，陶大宇以為我醉醉地和眼瞓想叫醒我。（咳了數聲）佢一推我就見我反白眼和抽筋。好在有好多專業人士如婦科醫生、警務人員，和有朋友學過急救都喺度。袁偉豪就好到即刻衝入廁所洗手，然後畀手指我咬，叫我唔好咬到條脷。可能我本身有啲感冒又飲咗啲酒，一咳就入咗肺，導致我昏迷。」
Bobby透露入院時已沒有呼吸能力，需要插喉輔助，他猶有餘悸說：「真係好辛苦，真係死得o架。由凌晨兩點搶救到翌日下午兩點，共十二個小時。醫生話我真係大命，幸好意志力堅強，醒得快，否則昏迷時間愈耐會愈危險，可能成為植物人。真係死過翻生，要多謝朋友、太太，患難見真情。」對於有傳他因「暴飲」而出事和隱瞞實情，他說：「酒實有飲，但唔係飲好多。只不過可能攰攰地，我拍《情逆三世緣》啲戲份又重啲。」他又透露曾經有次開廠，聞到強烈天拿水味令心口痛和牙骹緊，他說：「我仲笑話如果有事就送我去通波仔，關詠荷仲話我咁衰邊有咁易死。」
講笑下次用腳趾
記者聯絡上當時身在現場為Bobby急救，亦合作《情》劇的袁偉豪，他說：「我學過心肺復甦，當時怕佢抖唔到氣，畀個舒服位佢呼吸，我都有幫佢扣喉。多嘅我都唔敢做，人命嚟o架。事後，佢打畀我講多謝仲識講笑，仲話下次唔好放手指，要放腳趾。」
文：影視組