王祖藍 黎耀祥 赤口開戰爭視帝
近來挾劇集強勢上位的王祖藍趁年初三「赤口」，帶埋同劇拍檔萬綺雯「鬥」住應節！在劇中演新移民演到入型入格的祖藍今年大有機會問鼎視帝，湊巧麥玲玲日前亦批黎耀祥有望四度封帝，料不到蛇年伊始，視帝戰幔已悄悄揭開！
王祖藍與萬綺雯（蚊蚊）因為劇集《老表，你好嘢！》人氣急升，二人希望可以食住個勢，旺足全個蛇年！趁住大年初三「赤口」，這對活寶貝搞鬼應節化解戾氣，正如劇集話齋，要「和諧、和諧」，為求「整蠱」祖藍，蚊蚊竟將一大堆賀年裝飾放在祖藍的頭上及膊頭上，而祖藍為了拉近與蚊蚊高度之距，則將炮仗放在自己的頭上扮高佬。
祖藍於《老表》的演技最初被網友批評太做作，後來觀眾愈睇愈順眼，大有機會憑新移民「蔡芯」一角，問鼎蛇年視帝。無獨有偶，堪輿學家麥玲玲日前亦批黎耀祥（祥仔）有望四度衝擊視帝，到時兩雄相遇，定必掀起一場龍爭虎鬥！對於視帝寶座，祖藍謙虛地說：「多謝大家畀面，祥仔太犀利，唔敢同佢硬碰！我自己反而唔係最想攞視帝，而係套劇可以攞最佳劇集，皆大歡喜！」
習慣喺無綫拍劇
貴為三屆視帝的祥仔手頭上暫時有兩套劇，包括《傳愛事務所》及《巾幗梟雄之諜血長天》，檔期已排到7月，更會到中山及佛山等地拍攝《巾》劇，對於再封帝則表示隨緣，直言不會諗太多。至於近年無綫小生在內地拍劇，賺到盆滿缽滿，未拍過內地劇的祥仔反而並不太恨拍：「我唔特別強求，我自己慣咗無綫拍劇方式，內地劇雖然價錢多啲，但係天氣、文化又同我哋南方唔同，可能到時飲食會唔慣。」而今日他會與玲玲拍住上現身賀年活動，蛇年伊始就豬籠入水！
萬綺雯挑剔有理
受《老表》熱潮影響，祖藍笑言蛇年工作機會浪接浪，除了忙拍無綫劇《食為奴》外，稍後又要忙在中港兩地宣傳新碟、接拍葉念琛執導的新戲及籌備《老表》續集。至於內地工作，祖藍直言可能要暫停：「有內地劇同電影搵我，劇嘅酬勞都成六位數一集，但我都唔接住，想留多啲時間喺香港。（多啲陪女友？）都係嘅。」至於蚊蚊亦直言自《老表》後，找上門的代言工作很多，但她沒有全盤接下，皆因宗旨是「貴精不貴多」：「我要做一個有良心嘅代言人！」
最佳主持：王祖藍
年齡：33歲
代表作：《老表，你好嘢！》、《同事三分親》、《荃加福祿壽》
獎項：
2010年：萬千星輝頒獎典禮——最佳節目主持（《荃加福祿壽》）
2009年：萬千星輝頒獎典禮——最佳節目主持（《鐵甲無敵獎門人》）
2008年：萬千星輝頒獎典禮——飛躍進步男藝員
身價：內地劇每集約18萬元人民幣（約22.3萬港元）；電影每部約100萬港元
三屆視帝：黎耀祥
年齡：48歲
代表作：《巾幗梟雄》、《巾幗梟雄之義海豪情》、《大太監》
獎項：
2012年：萬千星輝頒獎典禮——最佳男主角
2010年：萬千星輝頒獎典禮——最佳男主角
2009年：萬千星輝頒獎典禮——最佳男主角
身價：內地劇每集約30萬元人民幣（約37.3萬港元）
文：專案組