官恩娜坐硬一姐位
官恩娜（Ella）去年轉投華納升呢為新一姐！新正頭公司眾人食開年飯，Ella更與一哥方大同平起平坐，化身左右門神傍住老闆Gordon兩邊，Gordon又親自為Ella夾餸，Ella一加盟就得寵，新一年定有運行！
華納老闆Gordon帶領一眾歌手包括方大同、官恩娜、周柏豪、連詩雅（Shiga）及樂隊Dear Jane昨日提前食開年飯，希望蛇年事事順利。去年Ella加盟，她笑言投身華納有「復出」的感覺：「嚟到新公司經過磨合期，希望可以重新出發，以前可能多啲時間拍劇，但依家可以專注做音樂，音樂上會強好多。（做一姐？）唔敢，我最多年紀上係，係加入咗個大家庭啫。」雖然Ella口裏說不敢當一姐，但食飯時卻獲安排與一哥方大同坐在老闆兩旁，一姐地位呼之欲出。
方大同即將續約
方大同將約滿，他說續約成數高：「跟咗華納咁耐，有關係喺度，最緊要大家方向一致。」他透露新一年想在內地和台灣市場再下一城，問到對感情的期望，一直只醉心於工作的方大同說：「做咗巡迴之後先算，時機未成熟。」
去年周柏豪的事業更上一層樓，賺了不少的他自爆今年準備的利是錢金額遠超上年，更透露今年公司已有計劃讓他進軍紅館，又希望可接拍更多電影：「之前做過好多角色，但我想試吓拍個簡單愛情故事，大團圓結局嗰隻，公司都傾緊。」
連詩雅唔怕緋聞
Shiga去年緋聞一籮籮，先有與前男友曲赤的親密照流出，之後又被緋聞男友關楚耀的前女友Megan狂插是小三，Shiga說會樂觀面對：「喺呢行有好嘢，自然有唔好嘢，可能多人識，每做一樣嘢都會被發大。面對呢啲新聞唔開心會有，但當係推動自己。」樂隊Dear Jane亦希望今年可有更多機會出騷，更揚言一個月做一首歌，務求能出雙CD。
文：音樂組
攝：鄭家俊
髮型：Eve Chiu@Queen's Private i（Ella）、Carr Cheng@PoP8（方大同）
服裝：Duras Ambient（Ella）
場地：都會海逸酒店