葉德嫻教訓觀眾：亂拍掌 叫黐線

七年之癢 再踏紅館

相隔七年再踏紅館開演唱會，主辦單位和我沒有刻意選擇吉日，但開騷日子正是「三八婦女節」，幾易記。今次能夠在紅館開騷，是因為有投資者夠膽量請我，自問屬廉價勞工，以歌會友，是本大利小演唱會。加歌酬？我都想，但主辦商話冇，話我唔值得喎，等如樓價不斷升，人工就冇加過。

不會特別編排舞蹈

搵我開演唱會唔難，我首要要求是「靚聲」，音樂質素好重要，所以，當主辦商找我做巡迴演唱，但卻說不能再請金少剛老師（內地著名音響工程師）陪我走埠，那我選擇不會做。今次只是好基本要求，但不明個個都覺得我好似好巴閉，其實我唔巴閉，我想講，咁basic嘅嘢都做唔到，冇嘢o架，畀碗飯你食，畀對筷子你扒，不如用手「拿」啦，一樣之嘛。我明白觀點與角度各人不同，但對我來講沒這個配套，我就沒信心去做，那不如不做啦。

葉德嫻威尼斯封后，捧着金盃獎座與大家分享。

葉德嫻自認率直，圈中發展最怕做宣傳。

今次個唱嘉賓不是沒有，只是並不是大家想要的「那兩個」，但一般人則認為沒「那兩人」就等同是沒嘉賓，你可以選擇不看，但話我冇嘉賓就大吉利是過你，每一位入場觀眾都是我的嘉賓，上得我舞台的人都是我好朋友，雖然不一定有知名度，但他們對音樂絕對有貢獻。合唱歌莫非就要定死和那個人合唱？非也，大家唔好咁狹窄囉，嘗試與不同人合作才會有新火花。會否有載歌載舞環節？放心，我不準備跳脫衣舞，最多郁幾下動作，特登排隻舞不是我風格。

今年三八婦女節開騷的葉德嫻，早前舉行記者招待會。

2005年葉德嫻於紅館舉行三場演唱會。

入場觀眾須守規矩

作為歌手在台上會盡歌手本分，觀眾的本分是盡情享受，做我嘅觀眾則沒有pon pon棒玩，我每唱完一首歌大家喜歡可以拍掌，唔鍾意可以不拍，但切記在我唱歌時請勿拍掌叫囂，你想嗌可以行出場館嗌，冇問題o架！但我唱緊歌嘅中段，你無啦啦拍掌呢啲叫黐線呀！而看我個唱會被形容有「規矩」，觀眾要準時八時十五分前入場，其實大部分觀眾都好準時，係我哋有啲Artist開場慢啫，唔關觀眾事，有啲觀眾知你哋唔準時，咪遲啲嚟，咁呢啲觀眾自負盈虧嘞。至於我生活一向健康有規律，習慣早睡早起，九點前一定上床瞓覺，但為配合演唱會，反要調節夜啲瞓，免得唱唱下我會眼瞓。

從未贏過「女歌手」獎

回顧頒獎禮，最近一次出席音樂獎的舞台是2004年演繹合唱歌《美中不足》，而實質在音樂上奪獎的數目不多，亦從未贏得過「女歌手」獎項，有人認為有獎才能給自己肯定，但我冇呢個想法，反而奇怪為何大家覺得有獎先叫肯定，如果我自己都唔肯定自己，就算有獎給我都冇用，相對不會因為有個獎就覺得自己「好掂」。不過，有好多人根本唔識唱歌，又唔識做戲，都會攞好多獎，呢個就係觀點與角度，我不會因那個人有獎，而令我覺得對方識得演戲或者唱歌，當然我攞獎時亦可以有人唔認同我一樣。

當年由唱歌轉戰演戲，唔關頒獎禮制度或是投資者問題，而是怕做宣傳，至今宣傳工作一直我最弱，我性格又太率直，率直到冇禮貌，加上當時不想再做音樂，覺得音樂水準好低，但最估唔到「低處未算低」，現今樂壇水準就更加低低低……好低。

做件有實力「商品」

正所謂演藝圈，做藝人優先條件是靚仔靚女，後生夠青春，反而實力就冇要求，似一件商品多過似人，就算當年我出道的年代，投資者都一樣當你係商品，唔當你係人，唯一不同至少要件「商品」有實力，最低限度識得唱歌，唔同現在有個樣就work就可以走去做歌手。

口述：葉德嫻

筆錄：高美　

攝影：沈健程

化妝：Stephen L　

髮型：Billy Choi

形象：AndyDaniel