許廷鏗狼狽吸塵 老闆勁Like
鄭欣宜、吳若希、許廷鏗及胡鴻鈞等星煥歌手趁今日年廿八齊齊返公司洗邋遢，除夾手夾腳省靚公司招牌外，更為老闆何哲圖抹枱及執垃圾，難怪氹得老闆開聲表示眾人是2013力捧對象，令四人開心得尖叫及連番講多謝。
鄭欣宜、吳若希、許廷鏗及胡鴻鈞等人日前拋下歌手身份，化身清潔「女工」返公司「大掃除」，四人合力吸塵、抹枱、拖地及省招牌，不過見他們有姿勢無實際，身為老闆何哲圖（Herman）更監視許廷鏗吸塵，雖然眾人顯得雞手鴨腳，但仍獲Herman舉手指公讚「Like」，還表示眾人是今年力捧對象，氹得四人(o依)嘩鬼叫。
緋聞屬笑料
Herman透露2013年公司大計，先為許廷鏗及「嘉欣BB」鍾嘉欣舉行個人音樂會，接住會為許廷鏗及欣宜、吳若希及胡鴻鈞物色合唱歌，由於許廷鏗與欣宜正傳緋聞，問到是否要安排兩人情侶檔合唱？欣宜即搶答說：「笑料一則，邊有人信吖，不過冇所謂，大家開心就得。」
被傳入雪櫃
由於有指Herman對「嘉欣BB」寵愛有加，抵死的欣宜即場問老闆說：「你唔錫我喇。」搞到Herman面紅耳熱，欣宜補鑊說：「其實佢都好錫我。」有傳星煥會將吳若希放入雪櫃，Herman否認說：「唔係，做緊新歌啦。」隨即行到對方身邊以表支持，記者笑吳若希出道耐過「嘉欣BB」及許廷鏗，但兩人卻開音樂會，吳若希笑說：「真係好傷心。」
採訪：音樂組
攝影：鄭家俊
許廷鏗 服裝：Mijosu
吳若希 服裝：Reebok
鄭欣宜 服裝：Microwave
髮型：Milk@Xenter