莊思敏Bra辣迎春
還有兩天就是大年初一，近期賺到盆滿缽滿的莊思敏特前往銅鑼灣鬧市辦另類年貨，單拖現身的她先到內衣店揀紅底「做節」，之後又轉戰金舖買金鏈，短短兩小時便掃了五位數字的貨，相當大手筆！
日前，一身貼身迷你裙打扮的莊思敏單拖現身銅鑼灣一間內衣店，她應節地專攻「紅噹噹」內膽，又不時彎腰挑選，每當她俯身揀底底時，短裙即被拉起，雖然未有走光，不過已經引來店內顧客眼望望，不過她卻懶理他人目光專心揀內衣。
新年氣氛紅噹噹
眼見莊思敏件件揀上手的內衣均非常有「新年氣氛」，清一色鮮紅之餘，更挑選十多件性感喱士款式，又頻頻出入更衣室試bra，未夠一小時已經掃了至少一打內衣！買完一輪內衣，莊思敏拿着一袋二袋戰利品，轉戰附近的金舖繼續大出血。
買金鏈條條重秤
見她一個箭步走到櫃枱揀金元寶，又叫店員擺到滿枱金，明顯有備而戰。之後她又拿起多條金鏈試上手，條條重秤至少過萬。莊思敏前後挑選僅十分鐘，揀了最重手的一條金手鏈便碌卡走人，出手非常闊綽！莊思敏近期明顯豬籠入水，先是連開兩部新戲，近日又重返電台開咪做主持，其電視節目《姊妹淘》又長做長有，難怪「過肥年」的她買金買到唔眨眼。
文：專案組