陳煒密實舞蛇嚴防抽水
藝人陳煒（煒哥）、高海寧、苟芸慧、沈卓盈和許亦妮等一眾靚女昨日為新春節目《靈蛇喜舞賀新禧》練舞綵排，要與蛇共舞的煒哥化身「蛇王煒」，雖手執兩蛇卻面無懼色，期間不斷與蛇喪擺甫士，將蛇玩弄於股掌之中，可憐隔籬一班小花聞蛇即變，沈卓盈同高海寧被嚇至花容失色，驚到雞飛狗走，要煒哥捉實條蛇方敢埋身合照。
驚過見鬼
煒哥指因近日常與蛇合作拍賀年照才會「揮蛇自如」，作為表演唯一「揸蛇人」的她，表示屆時會密實示人：「表演會密實啲，怕鹹濕蛇會周圍『捐』。」而沈卓盈笑言見蛇驚過見鬼：「細個被媽媽呃飲『雞』湯，諗住添飲啦，點知發現個煲入面有成條蛇屍喺度，嚇到連煲蓋都打爛埋，之後都唔再敢見到蛇。」
節目添食
另同樣是怕蛇一族的高海寧昨日亦出席了《順峰順水》記者會，指節目將會添食，她透露自與玄學家蘇民峰合作後即接獲兩套劇集，兩劇角色更令她感到精神錯亂，當問會否在節目性感打扮提高收視？她說：「唔使我性感啦，師傅喺度就係收視保證。」
文：影視組