英皇擲半億 誘阿佘簽約
有傳英皇以半億拍兩部電影利誘佘詩曼簽約，英皇方面坦言曾與阿佘接觸，並會繼續游說對方；阿佘亦稱初步有接洽過，但錢是其次，最重要是自由度及年期。
佘詩曼自離開無綫後工作冇停手，一直於大陸拍劇搵人仔，現時難得空閒，即返港休息。有傳阿佘今年會返無綫與黃子華合作拍劇，正當觀眾期待再次見她於電視螢幕出現，但據知情人士透露， 英皇一直想與阿佘簽約，因英皇旗下女藝人如容祖兒、Twins都主力唱歌，雖然她們亦有拍電影，但始終都想吸納一位專注影視發展的女星。
錢其次 要自由
最近，阿佘之前由無綫至今一直沿用的經理人加盟英皇，故英皇已透過該經理人力邀阿佘加盟，為表誠意，更開出五千萬天價每年拍兩部電影，誓捧她做「英皇影視一姐」。記者昨日向英皇電影藝人部發言人求證，他坦言曾與阿佘接觸，公司很有興趣邀她加盟，會繼續游說對方。問是否出半億利誘阿佘？他只謂雙方未去到傾條件階段。而阿佘昨日於電話中回應時稱：「乜話？五千萬？太誇張嘞！不過聽吓都開心，係初步傾過，因為就嚟約滿，都多人搵我傾。（價高者得？）錢唔係最重要，自己唔想再簽長年期嘅合約，所以要視乎自由度、年期。」她又指還欠無綫一部劇，但今年會還清。
遇到愛 勇敢去
另外，阿佘的戀情亦甚受大眾關注，之前她接受訪問時表示：「自己喺十年前為咗工作甘願放棄一切，包括愛情，依家唔同喇，遇到愛，我將會勇敢去。（想嫁入豪門？）我從未諗過，只想嫁一個自己愛嘅人。」
文：影視組