JC警鐘飄香做蛇新娘
身為「龍女」的警鐘胸模Jessica C.（JC）龍年犯太歲，現在送龍迎蛇感到十分興奮，特地趁年廿八「洗邋遢」來個玫瑰花牛奶Spa，洗白白迎新歲。沐浴在愛河中的JC與拍拖半年的男友愛得甜蜜蜜，亦希望能與男友開花結果，更不排除做蛇年新娘。
今年已是Jessica C.第三次在香港度過農曆新年，鬼妹仔的她早就學會入鄉隨俗，按照中國傳統習俗慶新年，所謂「年廿八洗邋遢」，JC亦特地大解放來個玫瑰花牛奶Spa，讓自己身心refresh一下，香噴噴、滑溜溜、肉騰騰的迎接蛇年。
想有另一半安慰
生肖屬龍的JC，對「送龍迎蛇」感到十分雀躍，她說：「我龍年犯太歲，感覺今年真係麻麻哋，事業都ＯＫ，係情緒方面比較波動，有時會好低落，好多嘢諗，我相信自己蛇年會更好！人哋話犯太歲代表有轉變，我的確喺思想上同感情生活上都有好大改變，由單身變為有男朋友。」龍年之初她曾說過不想要男朋友，但年中JC的諗法已經改變：「我渴望得到愛，想有個人支持自己，同我分享我嘅生活，當我需要佢時可以安慰到我。」
情路上曾遇人不淑的JC終走出陰霾，再次相信愛情，與現任男友Bryce Bond拍拖半年，雖然Bond身在美國二人分隔兩地，但依然愛得甜蜜，JC說：「佢好錫我，時時都令我笑，同佢一齊我可以做番自己，感覺好舒服，唔會有任何壓力。我哋又有共同興趣，好夾得嚟，相處得好開心。我成日都會好掛住佢，好想佢嚟探我，又或者係我飛過去探佢，不過知道大家都要以事業為先，依家係搏殺期。」
想男友驚喜求婚
JC承認Bond是她的工作動力，她會更努力工作，快點達成事業上的目標！每次拍拖JC都非常認真，她希望能與Bond開花結果，不排除做蛇年新娘：「愛一個人當然想同佢有將來，我同其他女仔一樣都會想同深愛嘅人結婚。但依家未係時候，要努力工作先，想有更好嘅成績。不過如果Bond飛嚟向我求婚，畀surprise我，我都會嫁畀佢。」情人節將至，她有意送戒指箍實男友。
化妝及髮型：Dora Chan@spotlight image
場地：Vegas Aso spa
文：名人組