林子祥爆乖仔唔只一個
形象乖仔的林德信日前被《好報》踢爆與日模松岡李那暗撻三個月，即使有相為證兩人仍例牌否認。而前晚和音樂人趙增熹開完演唱會的林子祥（阿Lam），當聽到囝囝帶新歡回家過夜時就皺晒眉頭，更謂囝囝多「朋友」，不只松岡一人，似乎「松岡難過老爺關」！
林子祥（阿Lam）和趙增熹一連兩晚在會展舉行的《絕對熹祥A Mix & Match Concert》前晚圓滿結束，阿Lam完騷後在後台一臉倦容，而Lam仔林德信在後台影完幾張相後便立刻閃人，似怕被追問與日模松岡李那的緋聞。有傳阿Lam嫌棄松岡走性感路線，故囝囝將戀情保密。問到阿Lam知否囝囝拖女回家過夜？他一臉愕然︰「吓！唔係嘛？佢好多朋友嘅。（平時有冇帶女朋友畀你見？）有o架，見吓面食吓飯咁樣。」不過當問到是否喜歡日本新抱時，阿Lam就有少許動氣︰「我諗佢唔只一個朋友，咁後生仔，尤其呢一行接觸咁多人，個個都有嘢傾吓，食吓飯好Natural！」語氣似乎唔多滿意松岡這位緋聞新抱仔，看來松岡要進入林家門要加把勁！
唔認避記者
至於當事人林德信昨午出席活動時就否認有心避記者︰「因為今朝要凌晨5點開工，所以尋晚好早就走咗。」但當問到松岡上他家「送外賣」時，林德信似乎早已與松岡夾好口供︰「我哋好多Common Friend，上個禮拜佢生日，我哋成班Friend約咗出嚟玩。咁啱又喺我屋企附近，之後咪成班Friend一齊上我屋企玩囉。」不過就未有解釋為何相片中只出現他倆身影。
而前晚舉行的演唱會除了有朱玲玲和Lam媽捧場外，太太葉蒨文（沙麗）亦坐在控制台睇足全場，看到阿Lam和火辣女Dancer跳熱舞時更投入得手舞足蹈。
文：音樂組