Yumiko 時尚心得：大膽創意

Yumiko近年跟時尚掛鈎，夢想一如好友徐濠縈，進駐時裝界，開設自己的時裝店，她表示：「香港時裝發展得幾好，港牌Ground Zero舊年去咗巴黎時裝周，好鼓舞！自己好鍾意打扮，形象顧問就未諗過做，但開時裝店就一直想，會喺呢一兩年內實行，原本已ready好，只差少少，但決定忙完人生大事（結婚）先，原本諗過一齊搞，都係唔好啦，我會同一個朋友一齊搞，間舖會賣自己鍾意嘅衫。」

夠膽穿唔代表靚

提到心目中的fashion icon？Yumiko首選英國超模姬摩絲（Kate Moss）和好友徐濠縈：「我好鍾意Kate Moss，因為佢係一個穿着好簡單，但好有型嘅人，佢影響我好多，令我知道靚嘅衣着唔需要太誇張，係睇件衫cutting同個人態度。我依家揀出席重要場合嘅衫，都會諗如果係佢，佢又會點着呢？」至於好友阿徐，她坦言很欣賞對方：「佢好夠膽去着任何衫，同埋顏色配搭愈嚟愈爐火純青！有時見佢出嚟，襯得又好嘢喎！」

Yumiko年尾出嫁，正為揀選拍攝婚紗照地點而頭痛。

Yumiko去年受傷得男友Andy悉心照料，更因而促成兩人婚事。

問Yumiko有何穿衣之道？她表示以前會看很多時裝雜誌：「睇到鍾意就會試，我覺得着衫一定要有好奇心，如果冇，你好有自己style，但都冇變化，所以睇多的，願意接受多的新嘢。我覺得自己唔啱好lady嘅嘢、好公主甜美嗰啲，其實我麻麻地，反而硬淨、比較男仔啲，我就最鍾意。」而她的「時尚定義」亦很簡單，就是穿別人不敢穿的：「要夠膽，但夠膽唔代表靚嘅，我都着過好多夠膽但唔靚嘅衫，哈哈。」換言之，時尚就是一種大膽的創意。

鄭希怡大讚徐濠縈的衣着打扮爐火純青。	Yumiko向夢想進發，積極籌備開時裝店。	Yumiko直言對婚紗設計有初步構思。

她自爆讀書時期常被同學取笑衣着品味：「讀書時對自己着衫好冇信心，試過去秋季旅行，唯一一日唔使着校服，我就會用好多時間諗：『着咩衫先唔失禮呢？』完全冇方向，亦唔知咩係啱自己，心諗點解啲同學成日笑我老套嘅？嗰時細好少自己買衫，屋企人好鍾意買套裝畀我，平日出街我會着套裝，同學就笑我：『嘩！乜你咁o架？咁娘o架？』哈哈，所以我係入行後先識着衫，初入行有設計師話我聽自己優缺點，好似我個人身高手長，就唔好着得好臃腫，簡單啲就得。」難怪Yumiko得出的穿衣心得是：「靚係要累積落嚟！」

因禍得福今年嫁

近數年在大陸發展的Yumiko，去年中在泰國替朋友慶祝生日時，不慎從3樓平台高處墮下，正當大家覺得她黑氣纏身，其實她也算是因禍得福，大步檻過躺在病榻上的Yumiko，獲拍拖7年的化妝師男友Andy悉心照料，對方還借機求婚，二人已定於今年底結束愛情長跑拉埋天窗！相信沒有今次的「禍」，彼此就不會患難見真情，如今Yumiko快將成為幸福新娘子了，問她會否自行設計婚紗？準新娘笑得燦爛地說：「唔會啦，因為婚紗幾考手工，有好多layer，質地又唔同，始終搵番有經驗嘅設計師好啲，但會參與意見，嚟緊忙完拍戲，我就會影結婚相，差唔多呢一兩個月就要搞掂。」

對婚姻曾失信心

提到婚紗照的構思，Yumiko笑得更甜：「我係有初步構思，我好貪心，始終婚只會結一次，所以我想將好多諗法一次過擺落去，暫時想去外國影婚紗相，原本擺酒想喺外國，依家既然決定喺香港擺，咁婚紗相就要喺外國影。」形象前衞的Yumiko也接受到近年興起的黑色婚紗，但礙於長輩較為傳統，故不會穿着，而她對婚姻亦曾失去信心：「其實我依家先結婚遲咗囉，以前細個係想28歲結婚，當我到咗28歲，又覺得自己唔會結婚，諗住呢世都唔會結！覺得點解要結婚？可能我唔太信任婚姻，但今次係一個緣分，突然間有啲嘢觸發到我，覺得呢個人可以一生一世，可以放心。」既然有了好歸宿，Yumiko就可以安心做自己喜歡的事，向開時裝店的理想邁進。

冰火婚紗照

結婚在即的Yumiko，拍婚紗照地點雖然未定，但已有兩個計劃：「一係去好熱嘅地方影陽光海灘，一係就好凍，冇中間位，哈哈，我着住婚紗喺雪山滑雪落嚟。」Yumiko又自覺跟未來老公Andy不是追求浪漫的人，更取笑Andy對鏡頭不敏感，不懂得拍照，只要配合到他，她去哪裏拍照都沒有所謂，她笑說：「佢影到就得o架啦，我唔擔心自己，衫佢可以carry到，但表情方面要練吓，其實我對佢冇要求，我諗住搵大家啲合照出嚟prepare，發現冇乜合照。」但Yumiko認為籌備過程已教她開心不已：「呢一刻好開心，到時一邊出trip一邊影，當旅行！」

採訪：李惠儀 攝影：謝國華

化妝：Natalie Soo@D-mop beauty by ND&Co.

髮型：Ziggie Lo@La Mod Salon

服裝：ATSURO TAYAMA

場地：Faces Music Lounge