官恩娜行硬桃花運
龍年即將過去，迎接蛇年來臨，過新年的習俗各處鄉村各處例，靚靚袁詠儀每年都會給張智霖和魔童在枕頭放壓歲錢；古天樂擇時辰同家人往拜神；而官恩娜更買定桃花，笑言一定會行桃花運！
官恩娜：「過年我一定依習俗轉番個桃花運，今年都買咗桃花，我好鍾意桃花，粉紅色又可愛，希望開得靚啦！」
胡定欣：「我屋企信佛，年三十晚一定全家人去佛堂叩頭拜神！」
劉晨芝：「因為屋企人喺美國，如果唔一齊過，會十二點打電話講新年快樂。如果一齊就會食賀年食品。」
莊思華：「我好老土，年三十晚踏正十二點，就一定要全身新衫，仲要愈紅愈好。我全家人都會咁，之後一齊食湯圓。」
陸詩韻：「我每年都會買新衫、新鞋、新內衣着，旺一旺佢！同埋由細到大，年初一至年初三都唔會洗頭，屋企人話咁樣先聚財。」
袁詠儀：「過年除工人外，全屋人都會放壓歲錢落枕頭，會將呢個傳統傳畀阿仔！」
古天樂：「過年屋企會擇時辰拜神，朝早六點同凌晨三點都試過，所以過年我一定留喺香港！」
前馬來西亞小姐黃淑玲：「馬來西亞新年都會食團年飯和拜年，仲有過年會食『撈起』，裏面有三文魚片、鮑魚片同好多顏色嘅蔬菜，食之前會撈勻。」
前港姐張舒雅：「我係潮州人，新年唔可以洗頭，不過對我嚟講無可能，同埋以前仲會去圍村放煙花。」
傅嘉莉：「我唔係同屋企人一齊住，但年初一朝早九點前會返到屋企，因為爸爸媽咪要派第一封利是畀仔女！」