林峯掟銀許願風騷唱BB
【呂詠雯首爾直擊】林峯與「千語BB」（吳千語）之戀情愈來愈浮面，前日林峯在韓國為示愛歌《BB》拍 MV，雖然天寒地凍，但近日春風滿面的他，暖在心頭，即使拍攝許願池掟銀仔，難度極高，他也中了兩次。
林峯前日在韓國首爾為新歌《BB》拍攝MV，雖然當地天氣持續徘徊在攝氏十度以下，但低溫並未減退林峯的工作熱誠，他與攝製隊走訪了首爾鬧市、清溪村等多個不同景點，又到許願池拍攝許願片段，他更遠距離掟銀仔許願，由於難度極高，結果亦中了兩次，令他異常興奮。問他許了甚麼願，他笑言：「頭先掟中嗰一刻時間太倉促，都冇時間諗。」
回味冰場點滴
林峯之後轉往露天溜冰場取景，更親自落場玩溜冰，但現場所見，他步步為營，似乎十分怕跌倒，要熱身一段時間，之後更大玩後溜等花式，似乎頗耍家，他說：「自從讀完書之後，好耐冇再溜冰，我發覺韓國嘅溜冰鞋同香港嘅設計唔同，韓國啲冰鞋好易仆，我着起都有少少驚，要時間熟習，我又諗起讀書時與同學去溜冰嘅點點滴滴。」他溜冰期間見到有小妹妹跌倒，更主動扶起，盡顯親切一面。
魚市場擺甫士
攝製隊又到魚市場拍攝，林峯更親手捧起各樣海產來擺甫士，完成拍攝後他表示：「本來諗住喺韓國拍快歌MV，但時間太倉促，最終搵咗首中板歌嚟拍，不過我冇諗過拍攝咁順利，簡直係超快完成！」