陳煒恨拍劇唔留戀亞視
去年復出於無綫拍劇的幸福少奶奶陳煒（煒哥）直言對舊東家亞視「冇留戀」，工作不斷的她笑言與老公各有各忙，雖然近一個月才見一次，但兩公婆未有互相詐型，反而各自享受自己的工作。
前亞姐陳煒於2008年下嫁台灣商人後便淡出娛樂圈，事隔4年她復出幕前更選擇離開舊東家亞視，走到無綫拍劇。提到舊東家亞視出招要旗下藝人上堂的做法引起回響，煒哥雖未敢講是逃過一劫，但她直言未有留戀︰「每個老闆有佢自己經營方式，外人干涉唔到，但在於觀眾立場會覺得一個電視台唔去好好地做節目，唯一表示不滿嘅方法就係唔睇囉，冇嘢啱我睇咪唔睇。」
提到新東家無綫，熱愛拍劇的她直言得到不少機會，她說︰「無綫多機會，有好多唔同嘅製作。其實係好事，因為一年前搬返香港，選擇復出幕前，因為想做番自己鍾意嘅行業。」
老公更忙
以「工作狂」來形容煒哥貼切不過，她直言每當投入工作便「六親不認」，問老公可有詐型？她則指老公比自己更忙，她說︰「佢仲忙過我成日周圍飛，但唔擔心佢呀，依家科技發達可以用電話維繫，不過以前嘅年代冇咁嘅科技，我就唔會考慮復出。」
她笑言與老公差不多大半個月才見一次，坦言二人都習慣這種相處方式，她說︰「我好欣賞佢認真做嘢，其實大家已經習慣咗，而且互相信任，係默契嚟，加上大家興趣都一樣，鍾意貓外又愛留喺屋企，不過佢返嚟我都會煮嘢畀佢食。」
文︰專案組