陳僖儀沈震軒互冧開房煙韌

無綫男藝員沈震軒（Sammy）及女歌手陳僖儀（Sita）因拍電影成為好友，同是單身的他們日前到酒店主題房間感受情人節氣氛，兩人煙韌歎晚餐，猶如真情侶般浪漫合襯！Sammy大讚酒店主題房甚有創意，當中他最愛日本京都及威尼斯主題：「好有旅行感覺，啱晒我哋，未必有長假期嘛！」Sita亦喜歡在私人空間中慶祝佳節：「去餐廳會同隔籬位坐好近，講咩都畀人聽到咁，呢度二人世界夠晒Sweet。」

有發展機會

提到兩人淵源，原來在未真正認識時，他們已互相「仰慕」，Sammy說：「我好鍾意Sita唱歌，舊年仲未識佢，我已經喺微博大讚過佢！相識後覺得佢好率直好真，好快做到知心友！」Sita表示一直有留意Sammy拍劇，並大讚對方靚仔，在《喜愛夜蒲2》開鏡當日，便立即主動索合照：「Sammy工作態度好好，長期都Ready，係幾吸引！」問到是否有發展機會，兩人即笑言「話唔埋」，希望今年可同台合唱及再結片緣。

沈震軒及陳僖儀相識不久已成好友，更直言互有好感！

同是單身的Sammy及Sita煙韌歎晚餐。

送花氹女友

提到最難忘情人節，Sita表示通常由她負責安排節目，絕對是名體貼女友：「我會準備好多嘢，有一年我帶男友去學整餅，咁就消磨一個下晝，佢只需要交個人，同埋配合笑吓。」Sammy則表示求學時曾買一大束粉紅玫瑰冧初戀女友，但入行後愈來愈忙，加上自己「冇心肝」，已甚少有慶祝的雅興。