林夏薇講紀律唔靠姦計上位
劇集強暴戲最近成為熱潮，在新劇飾演刁蠻小姐的林夏薇有幕被暴民圍堵拉扯衫褲，但她並不覺得該類戲份容易出位，講求紀律的她坦言最希望能演到律師角色，一圓她大學時代的未了緣。
近期在劇集中不時出現強暴戲，成為觀眾熱話，似乎也成為女星出位跳板，無綫小花林夏薇在新劇《初五啟市錄》有場被暴民圍堵拉扯戲份，問到林夏薇可覺得該戲會特別吸引觀眾？她說：「我又覺得冇乜特別，演員都係做番本分，睇劇本需要，導演要求，唔覺得拍呢啲戲容易出位，其實拍嗰陣感覺都好難受、好驚，恤衫都有啲扯爛咗，感覺好逼真，最後好彩黃浩然救咗我！」
預咗做炮灰
林夏薇是林峯堂妹，難免被外間認定她是千金小姐，在新劇飾刁蠻西關二小姐豈不是度身訂造？原來只是大家先入為主的印象，她說：「呢個鍾意鬧人嘅刁蠻小姐一啲都唔似我，我平時好有紀律，唔係日日瞓到自然醒嘅大小姐。」
賀年劇每每被視為「炮灰劇」收視難有突破，林夏薇表示：「開拍時已經知道係賀年劇，最緊要觀眾睇得開心。」她又自嘲手腳不協調：「有場要一邊打開車窗，一邊擲錢畀啲苦力，但係NG咗幾次，我都問導演係咪我手腳唔協調，哈哈！」林夏薇至今參與了四套劇集，扮過刁蠻小姐後她最想扮演律師角色，她說：「當初讀大學如果唔係讀戲劇就係會去讀法律，所以都想試吓做律師角色，做戲最開心係可以體驗唔同嘅人生。」