偉仔夠皮 拒再做宗師
梁朝偉昨現身港大出席座談會，過千座位極速爆滿，另有600位學生被安排在候補名單上，超級旺場！早前有指偉仔因戲份問題，跟王家衛不和，偉仔否認其事，但亦直言為免失新鮮感，不會再做葉問！四月將有假放的偉仔，揚言希望跟老婆劉嘉玲一起去做善事，造福社會！
梁朝偉與動作導演袁和平（八爺）及演員劉家勇昨日獲邀到香港大學出席《一代宗師》座談會，偉仔魅力沒法擋，過千座位全場爆滿一票難求，門票在兩小時內派晒，候補名單多達600人。偉仔甫進場便獲全場起立歡呼迎接，各師生眼見國際巨星駕臨亦忍不住拿出手機喪拍，大會亦送贈一條頸巾給偉仔以示感謝。
孖嘉玲參與公益
偉仔表示首次到學校進行對談會，分享拍攝感受，有傳《一》片將開拍續集，偉仔斷言不會再拍：「唔會，（拍三年驚咗？）唔係，想試其他嘢，需要新鮮感，再拍同一樣嘢就唔好玩。」他透露忙完宣傳工作後，四月希望放兩個月假，與劉嘉玲參與公益慈善活動。《一》片將成柏林影展開幕電影，談到刪減戲份傳與導演王家衛鬧不和時，偉仔一笑置之：「哈！哈！哈！真係笑死人，點會呢？同佢咁多年朋友，唔會計較呢啲。」
旺角謝票心情靚
甄子丹與梁朝偉先後扮演葉問，難免遭人比較，而國際著名武指袁和平便為兩人平反，八爺說：「兩個唔同風格，唔同特色，冇得比！」八爺中肯地說：「偉仔拍純功夫片差啲，不過動作感好。」眾人出席完座談會後便趕往旺角戲院謝票，吸引過百人爭相拍照，心情靚爆的偉仔亦開金口說：「Hello，大家好！」現場還有舞獅贈興。
文：影視組