伊健拖妻返港 向兄弟耍冧
鄭伊健和蒙嘉慧（YoYo）於周一在東京「秘婚」成功，可惜連兄弟亦冇畀面通知，令一班兄弟嬲到震，昨晚伊健和YoYo十指緊扣晒婚戒返港，伊健為箍兄弟情即場「耍冧」補鑊！
一對新人「蒙麵」上月28日在東京古堡舉行秘密婚禮，僅度過3日短暫的蜜月，昨晚8時半伊健跟YoYo返港，兩人全程十指緊扣，同於左手大晒簡約婚戒。面對半百傳媒在機場等候，升呢做了鄭太的YoYo全程冧笑似足小女人，大部分時間交由伊健作答，兩人大方企定定讓傳媒拍照。被問到新婚感受時，伊健搞笑說：「頭先表達咗。」YoYo在旁笑着補充：「開心！」
大排檔補祝
一心想低調結婚的伊健得知得罪了一班好兄弟，伊健第三句已即刻耍冧：「要同好多朋友講唔好意思，有啲朋友請唔到。」更特別點名要向錢國偉說「唔好意思」：「因為知佢要趕賀歲片好忙，先唔敢通知。」對葛民輝揚言要跟他絕交，他笑說：「都好。」但即補充指相信對方只是說笑。有指他會補擺喜酒？伊健搞笑說：「吓！仲嚟？唔係吖嘛！」他又坦言不同階段結識不同朋友，所以他有不同處理方法補鑊，他笑說：「好似古惑仔就去大排檔囉。」
「嫁錯時間添」
他們揀選在東京秘婚，因日本是兩人首次去旅行之地，伊健透露會在港另覓一個特別地方補辦註冊手續。談到伊健在婚禮上被爆激動大哭，他笑說：「有啲嘢寫吓，開心就笑，過程最激動就係依家。」問他對太太可有愛的宣言？他笑說：「呢啲唔喺呢度講。」至於YoYo亦笑言未適應被喚鄭太，還戲言：「唔係第一年唔使派（利是）咩？」記者笑言新婚要派雙封，她甜笑着講笑：「哎吔，嫁錯時間添！」
伊健從記者口中得悉一班舊愛異口齊聲恭賀他後，即收斂笑容說：「知道，多謝。」伊健老友陳小春日前也報喜今年會做爸爸，問伊健可會隨老友齊齊生B？伊健說：「睇吓佢搞唔搞得掂先啦。」說罷兩人便往停車場，沿途更4度停下讓傳媒拍攝，心情靚絕，非常合作。
文：音樂組