黃光亮 「處男作」奉獻王祖藍

王：王祖藍 黃：黃光亮

王：當時考慮角色人選時，正值挖角潮，我問梁家樹（無綫監製）搵黃光亮好冇，佢停咗半秒就話好呀好呀！我同亮哥最初只係喺《獎門人》見過一次面，唔算好深入認識，我想好有誠意咁打個電話畀佢，唔知佢點諗，佢唔使為錢返嚟， ＴＶＢ畀到幾多呀！

黃：畀到，不過唔畀啫！第一次奉獻咗畀王祖藍，唔關ＴＶＢ事，因為佢打嚟，一話老竇，我就成個人都軟咗！啃完個仔，仲要啃個劇！

王：今次我特別緊張，有時喺片場我會問，亮哥呢場使唔使o架，唔使佢係咪可以抖吓呀？有時見到亮哥坐咗成個鐘都未使拍，我喺度會幫手睇吓。聽得佢講得最多有句口頭禪：「你哋尊重吓自己嘅職業得唔得？」佢唔係火爆鬧你，佢好有耐性，好尊重呢份工，覺得佢好神聖。

王祖藍與黃光亮外貌極相似，但原來二人性格極端。	黃光亮寸爆無綫，指拍劇相當辛苦。	王祖藍、王菀之、黃光亮和朱咪咪的組合，竟擦出不一樣的火花。

黃：有次睇電視台訪問一個95歲嘅漫畫家，我學佢，係佢教我，我點可以唔尊重自己？所以喺戲入面有句對白，我叫阿仔你唔好失禮自己呀，失禮人係假嘅，有時見到啲人工作態度唔係太認真，我會叫佢哋尊重吓你嘅職業，佢哋會諗。

王祖藍與黃光亮於《獎門人》首次見面。

王祖藍與黃光亮最近憑劇集人氣急升，二人演父子深入民心。

性格極端 最似把聲

王：個劇有啲情節我係安排兩個人做同一件事，嗰啲位我就覺得原來我哋真係幾似！

黃：我做乜佢都即刻做到！不過我覺得我哋唔似，性格更加係兩個世界。

王：有樣嘢好似，我哋把聲都係好沉！一笑都係好低音，把聲似過個樣。

黃：喺套劇入面有好多嘢我未咁樣演過，對我嚟講係一個考驗，例如父子關係未演過，個角色我就要做到呢樣嘢。同埋我拍咗50部戲加埋嘅對白都唔夠呢部多！嘩，辛苦到我成日都話唔好意思，對唔住呀，劇本嘅對白你唔可以改，因為好有深度，有想傳遞嘅訊息，唔係每個演員或導演都睇到佢想要嘅嘢。

王：諗番好幾個畫面都令我好感動。

黃：好彩呢幾年睇咗三百幾部電影，唔係有負你所約去做呢個角色，好難做。

王：相處落發覺亮哥係好有耐性嘅一個人，日曬雨淋，以為你會好暴躁，點知你好有耐性咁坐喺度唔出聲。

黃：你成日走嚟問我，你仲乜成日個樣咁鬼惡，生出嚟係咁嘅樣，咁點唧？後來先知原來我唔笑個樣就好惡！

全新演出 過到戲癮

王：今次亮哥出山拍戲，以後可以繼續睇番就好喇！

黃：其實十幾年前有人搵我客串，有啲一日有啲兩日，跟住仲話可唔可以收平啲，我話唔好收平啲，我畀十萬蚊你，你畀十日戲我！我真係咁o架，我想演戲，我又唔係要你啲錢！後尾啲人話我寸，可能啲人覺得我寸，十幾年冇人搵過我！拍呢套劇好過到戲癮，好多嘢未做過，呢部劇係全新演出，自己都無睇過，好想同佢拍部電影，如果無人投資就我自己投資o架喇！

王：仲有冇打算投資電影？

黃：之前喺北京開電影公司，監製、投資、參演一部法國電影，後來打咗兩場官司，用咗一百萬，贏番個版權，自己再拎去洛杉磯賣，都未Cover到打官司，嗰次當賺咗經驗，不過學費好貴！有機會都想再試吓監製。最近王晶有打畀我，話有個角色畀我拍，我都有興趣。

後記：防止虐Human Being會

好多人都話拍無綫劇慘過擔泥，直腸直肚嘅亮哥都忍唔住幽無綫一默：「拍劇唔辛苦，係無人道囉，如果人道啲嘅話，你要畀人瞓覺o架嘛，即係，奴隸社會過咗好耐喇嘛，我估唔到今日仲有奴隸社會，仲有班奴隸願意做！我當時打電話去防止虐「畜」會話有人虐待我，防止虐『畜』會又唔受理，諗住遲啲同王祖藍成立防止虐Human Being會！」

採訪：專案組

攝影：黎志輝

化妝：K.T Tsui

髮型：Ted Yeung ii hair&nail

造型：Dicky@baraka