Brian Wong現場騷磨練歌藝
創作歌手Brian Wong（黃子晴）出道前曾在商場和Cafe演出，他出道至今已演出超過一百場現場騷，俘虜了不少粉絲的心，Brian說：「佢哋通常都係睇完我嘅現場騷之後先會留意同支持我，其實我唔覺得自己靚仔，但佢哋都會願意聽我啲歌。」
問到Brian粉絲曾對他做過甚麼窩心的事，他說：「有o架！記得以前冬天唱商場騷，有粉絲會買定啲暖咖啡畀我飲，又會送禮物畀我。就算我唔係喺假日唱歌，佢哋一有時間就親身嚟。」Brian又表示粉絲的支持已成為了他的一大原動力：「試過唱商場唱到冇聽眾嗰陣，都真係幾灰，不過當收到粉絲送畀我嘅字條叫我唔好放棄，我就會好感動。」