湯怡下決心撩霆鋒教武
英皇小花湯怡（Kathy）自言天生是個怕醜女，雖然在娛樂圈打滾多年，每次見到前輩卻因擔心講錯說話，而未敢主動攀談，新一年她決意克服這個「前輩恐懼症」，目標是與外形Cool爆的師兄謝霆鋒搭訕，交流打戲心得！
入行7年的湯怡（Kathy）憑甜美外表，多年來獲導演賞識拍劇和拍電影，早前她便與黃日華和李璨琛合作王維基旗下新劇《開腦儆探》，然而入行以來她一直有個心理障礙，就是不知如何跟前輩打交道，她說：「其實我個人比較慢熱，又怕講嘢得罪人，尤其對住前輩就有種膽怯感，無乜自信心。」她表示起初與黃日華和李璨琛合作也是「粒聲唔出」，反而是對方主動打開話題，久而久之溝通得多，令Kathy開朗不少。
增值自己
Kathy亦自知這種「前輩恐懼症」無論對個人或事業也十分吃虧，現在她積極改變自己的想法，主動跟人溝通，又多看點書和電影增值自己，她透露下一部劇大有機會做打女，將要接受功夫訓練，她亦決定下次見到師兄謝霆鋒時，不再表現得怕醜，反而要主動討教，她說：「我以前見到霆鋒都會好驚，佢成日好Cool唔講嘢，但我經理人同我講，其實霆鋒個人最鍾意講功夫，如果同佢傾功夫，佢一定滔滔不絕，所以下次有機會見到佢，一定用呢方面打開話題。」
獲得鼓勵
她亦多謝好友鍾舒漫（Sherman）經常主動做她的心理醫生，給予她不少鼓勵，她說：「我有咩唔開心，都會搵佢傾，因為佢個人諗法好正面，可能接觸得佢多咗，我以前好多負能量，成日諗埋一邊，搞到成日都喊，經過同佢傾偈之後，依家正能量多咗好多，真係要多謝佢。」
文：專案組
攝：吳文聰
場地：Zummer