李璨琛自製機會創造今天
常言道：「戲如人生。」李璨琛就是電影中的寫照。他，入行不久因奪金像獎「最佳新演員」而叱咤一時；亦試過面臨過9個月冇工開的日子。雖然李璨琛的人生活像過山車，工作時多時少，幸好他擁有一手創立的服裝生意，才讓他的生活得以安穩。
李璨琛早前被捲入藝人飯局事件，經過一輪是非纏身後，更積極向前、投入工作。回想以前，他形容人生恍如過山車。1998年憑着電影《香港製造》奪得金像獎「最佳新演員」，高峰期試過一年接十三部戲，不過面對最風光的日子，他卻不以為然：「我又唔係靚仔、又唔係有乜才能，只係嗰部戲個角色比較fit我，而同一時間電影圈又冇我啲咁嘅樣，咁就中咗！雖然攞完獎有一刻真係沖昏頭腦，跟住一下子十幾部戲都有我份，我就諗究竟我係咪紅？不過後來諗番，攞咗個獎咁又點，又唔係錢。」
日日等運到
雖然李璨琛曾經風光，不過也有失意時，最深刻是9個月冇工開，日日過着等運到的日子：「2003年係人生最低潮，真係踎咗8、9個月，當時瞓醒就下午三點，跟住睇吓電視，之後又去中環飲茶，返到屋企睇吓新聞，到晚上8、9點，朋友又打嚟叫我出去食飯飲嘢，如是者過咗9個月嘅糜爛生活！」
穩坐過山車
面對如此沒人生意義的生活，李璨琛忽然驚醒，認為急需終止這種生活模式，另覓求生之道：「之後我話畀自己聽，唔可以再係咁，撇除經濟上唔掂，人都變得好唔掂，簡直頹到爆！好彩我唔悲觀，人哋畀唔到機會我，我就製造機會畀自己，搞服裝生意。所以話如果當時唔係有生意support我，我架過山車真係分分鐘炒！依家回想起，我嘅人生都算係咁，比上不足，但比下有餘。」
文：專案組
攝影：黃叔榮