二百萬賣廣告梁佑嘉澄清唔關爸爸事
歌手梁佑嘉（Abella）日前出席籌款活動，她表示自己曾早起賣旗籌款，欲以藝人的影響力感染其他人行善。提到有傳她爸爸斥資二百萬為其專輯在電視黃金時段賣廣告，她解釋：「爸爸好少參與我公司嘅事，爸爸都係睇到廣告先知我出碟，賣廣告係公司決定嘅，但多啲宣傳都係好嘅，不過我相信頒獎典禮會係公平嘅，唔會因為多廣告而有獎，而我自己覺得參加頒獎禮就好似搭飛機咁，我自己就仲喺經濟艙，都唔敢諗太多獎嘅問題。」
又問到會否因傳言而感壓力？她說：「澄清唔到咁多，不過聽得多會唔開心。」她又坦言入行兩年多以來面對最大的難題是如何做回自己：「有時淨係想講下唱歌，但焦點又會去咗第二啲問題，又或者屋企嘢，呢個係入行之前冇諗過，我想大家專注喺我工作上。」Abella又透露新一年希望作新嘗試，以往較多唱慢歌的她，現正特訓側手翻和雙截棍，準備在今年勁歌熱舞。