鄧麗欣遇風雪嗌救命
近年主力拍戲的鄧麗欣（Stephy），雖然未滿三十歲，但亦不怕升級做媽咪角色，先後做過四次媽媽的她經驗豐富，笑言將來生B她都不怕痛，但她拍劇遇上風雪，凍到手腳麻痹，急需搶購暖包黐身。
近年積極開拓內地巿場的Stephy，正身在橫店拍攝內地電視劇，劇中她有一個幾歲大兒子，她並不抗拒做媽媽角色，她笑說：「我唔怕認老，其實今次已經係第四次做媽媽，我本身好鍾意細路仔，家姐都有個小朋友，好鍾意同姨甥女玩，所以同小朋友拍戲唔係太難，佢哋都好乖，（幾時輪到自己生？）依家未諗住，將來順其自然啦。」自爆拍過生仔戲的Stephy笑言扮得好似，她笑說：「將來真係生都冇得驚，痛都控制唔到。」
等小方送驚喜
今次合作演員還有洪天明、魏俊傑，她說：「好開心同鄉里合作，因為之前喺大陸拍劇，好多時得自己一個香港人。」要在內地逗留三個多月，當地天氣嚴寒，最近仲落大雪，Stephy笑言搵食艱難，她說：「拍戲時係好辛苦，因為實在太凍，同埋落雪關係，又凍又濕，連腳板底都要黐暖包，唔係手腳都會痹晒，羽絨、暖水袋係必備，每次返港我都要預備大量暖包，大大話都買咗幾百個。」
農曆新年Stephy也要在橫店度過，她說：「個劇有三、四十集，新年都要開工，我未必有得返港，不過我哋習慣。」情人節豈不是也要跟男友方力申分開？她說：「應該都係要開工，嗰段時間佢都好似喺內地工作，睇吓到時會唔會有咩驚喜。」Stephy都開到口要驚喜，相信小方會識做！
文：音樂組