羅泳嫻有鋪癮儲「死人利是」

藝人羅泳嫻早前於劇集《心戰》飾演臥底妓女的女警，最終慘死一幕，令不少觀眾留下深刻印象。估不到原來泳嫻入行至今，「死」過無數次，為了令自己「死」得更有意思，她笑言近年儲起公司給藝員的「死人利是」，並寫下日期與「死因」，讓自己留個紀念：「以前我唔識儲起，依家都覺得有啲可惜，其實我未去日本讀書之前，真係乜嘢死法都試過！試過好論盡搞笑咁死、自殺、中毒都有，比較特別係中毒，因為食食吓飯要噴血，個攝影師都笑我噴得咁淒厲！」

無形象要顧累

除了《心戰》外，羅泳嫻參演的《仁心解碼2》、《回到三國》，統統難逃一「死」，問她可會感到介意？她表示：「唔會，公司畀機會我，我已經好開心，我又唔係選美出身，唔使顧太多形象，我連師奶都做過。記得曾經見過周星馳初出道嘅時候，有一場戲，佢演士兵，一出場就畀白骨爪打死，演員乜嘢都要演。」

普遍一蚊一封

無綫出名知慳識儉，雖則「死人利是」是為了讓藝員討個吉利，但大家都很有興趣，該「利是」究竟有否隨着物價高漲而「添啲」？在這方面，已屬「權威」的羅泳嫻則笑言：「咁又冇乜大變動，我一蚊、二蚊甚至五毫都收過，五毫子應該係因為個場戲太多人死，所以五毫一封，而我最近收嘅就係一蚊嘅。」

文：影視組