黃翠如補鑊喊足8粒鐘

藝員黃浩然、麥長青、黃翠如、許亦妮、樂瞳等劇集《師父‧明白了》演員日前相約到長沙灣吃煞科飯，浩然還帶了老婆及兒子出席，齊齊熱鬧一番。《師》是黃翠如與麥包第二次合作，稍後再開新劇更會三度合作，兩人拍劇而稔熟，變成老友。身為女主角的翠如自爆在《師》中原本有不少動作戲，但她打得實在太過「水皮」，動作戲份被刪減，反而麥包的武打戲變得愈來愈多，麥包取笑翠如說：「佢打招呼就得。」翠如則指會吸收經驗，日後為拍劇加緊練武。

眾人表同情

翠如雖然拍劇不能武，但卻有長處勝在喊得，她說：「套劇好多喊戲，嗰排都抽離唔到o架。有一晚直情要喊足七八個鐘，喊到好似開水喉咁，最初啲同事都深表同情，後來見我喊都睇到冇晒反應。」麥包則讚新劇落足本在廠內搭建了一個城寨拍攝，有場武打戲更拍了兩日，拍得細緻之餘製作亦十分認真。

帶妻兒聚會

黃浩然被問到平日少有帶妻兒出席聚會，他則說：「唔係，私人時間我哋多數一齊。」完成《師》後黃浩然將會放假休息並到外地登台搵真銀。許亦妮指拍劇最難忘反而是看見有場外景，黃浩然要在八九度低溫下赤膊攀石，看見也戥浩然凍。

文：影視組 攝：吳文聰