羅力威老竇力撐 做港版Jay
歌手羅力威（Adason）前晚出席祝捷會，獲歌迷及家人慶祝他於頒獎禮上獲得佳績，其父直言望愛子的成績能與周杰倫一樣，Adason聽後表示會努力，更讚對方是歌手們的目標！而即將出碟的他，更透露廣東歌及國語歌各佔一半，當中最愛自己填詞的《媽媽》。
羅力威（Adason）前晚出席歌迷為他舉行的祝捷會，並筵開19席，相當厲害！而其父及姑姐亦現身撐場，其父直言希望Adason能像台灣歌手周杰倫（Jay）一樣，問到Adason可有信心？他謂會努力，並言對方是任何歌手的目標。提到周杰倫有很多「J女郎」，問到他可擔心屆時多女生追求？他說：「認真嘅男人工作最有魅力，但太抬舉我，一向都唔惹呢啲！」而他日前受訪，對於去年於頒獎禮上得到好成績，他坦言過去一年相當努力，並贊同陳慧琳的說話：「佢講過頒獎禮對新人比較有用，呢個係真，新人應該有一個半個獎去鼓勵！」
即將推出新大碟《L.L.V.II》的羅力威，表示最愛新碟中送給母親的《媽媽》：「呢首歌係我寫詞，最能打動自己，亦係特登寫畀媽咪！（媽咪有咩評語？）佢聽咗喇，不過未有回應，我嗰陣燒咗隻碟，夾埋歌詞喺入面，當母親節禮物送畀佢。」
多唱廣東歌
Adason謂與家人感情甚佳，不過大家都很低調，故所有肉麻的說話都只會留在心中，不會說出口：「歌曲最緊要係有共鳴，希望呢首歌可以感動大家，提醒大家做乖孩子。」而之後亦會多唱廣東歌：「因為我嘅少少責任心，希望為本地樂壇盡綿力，履行番香港人嘅義務！」一向多唱國語歌的Adason，坦言唱廣東歌最難的就是咬字：「廣東歌係最難唱，因為廣東話好難去演繹，有時候啲字要拖長去唱，但拖得太長又會好易變第二個字。」
文：音樂組